Ministri i Infrastrukturës dhe Energjisë, Enea Karakaçi, deklaroi pas mbledhjes së sotme të qeverisë, se u miratuan disa akte të rëndësishme të ministrisë që ai drejton, duke u ndalur veçanërisht te masat e subvencionimit për transportin publik.
Ai theksoi se kjo është një masë e ndërmarrë në kuadër të krizës së hidrokarbureve, për të lehtësuar barrën e kostove për transportin qytetas, ndërqytetas dhe rrethqytetas.
Ai bëri të ditur se rreth një muaj më parë ishte zhvilluar një takim me shoqatat e transportit, përfaqësuesit e bashkive dhe Ministrinë e Ekonomisë, ku u dëgjuan problematikat e sektorit.
“Në atë kohë i dhamë fjalën që do të kishim një masë subvencionuese, ashtu siç bëmë edhe në vitin 2022, dhe sot kemi miratuar një subvencion prej 50 lekësh për litër për të gjitha shoqëritë e transportit”, deklaroi ministri.
Karakaçi e cilësoi këtë vendim si një lajm të mirë për operatorët e transportit dhe qytetarët, duke theksuar se masa do të nisë zbatimin që prej muajit mars, kur u ndjenë edhe efektet e para të krizës së çmimeve.
“Ne u angazhuam në atë takim me grupet e interesit të transportit që kjo masë subvencionuese do të fillonte nga muaji mars, dhe sot e kemi bërë realitet”, u shpreh ai.
Ky vendim, sipas ministrit, synon të lehtësojë barrën e kostove për transportin qytetas, ndërqytetas dhe rrethqytetas, duke siguruar që shërbimi publik të mbetet i qëndrueshëm dhe i përballueshëm për qytetarët.
