Ministrja e Integrimit Klajda Gjosha ka mbajtur një qëndrim kritik kundrejt Ministrive të tjera të qeverisë, duke thënë se personat përgjegjës, e sidomos zv ministrat do duhet të tregojnë më shumë përgjegjësi për procesin e integrimit. Gjosha shtoi se të gjitha ministritë dhe punët e tyre në lidhje me integrimin e vendit janë nën monitorim konstant.
“Dua t’u tërheq vëmendjen se do të jemi në monitorim mujor, kjo do të thotë që grupet ndërinstitucioinale të punës duhet të mblidhen çdo tre javë. Këto takimne duhet të kryhen, dhe në momentin që ato kryhen bëhet dhe raportimi direkt pranë MIE.
Ka pasur disa ministri që e kanë neglizhuar dhe ky është detyrim madhor. Duhet të jenë personat përgjegjës, për të qënë pjesëmarrës në këto takime. Nuk ka një memorie institucionale. Tërheq vëmendjen dhe zv. ministrave që duhet të jenë në krye të këtyre mbledhjeve. Nëse mbledhjet drejtohen nga shefat e sektorit nuk është e njëjta rëndësi. Unë realisht do t’u kërkoja vëmendje më të madhe se vetë vendi po ecën drejt një procesi me përgjegjësi më të madhe, po dhe punë më të shtuar”, ka theksuar ministrja Gjosha gjatë takimit të komitetit të koordinimit për integrimin në BE.
Ajo ka kërkuar gjithashtu miratimin sa më të shpejtë të reformës në drejtësi, duke theksuar se tashmë puna për integrimin e vendit është më voluminoze.
