Ministrja e Drejtësisë Etilda Gjonaj, së bashku me deputeten e Qarkut Mimi Kodheli bënë prezantimin e Prefektit të Qarkut Kukës, Kolonelit në rezervë Zenel Kuçana. Në prezantimin e Kuçana, Ministrja e Drejtësisë dhe Kodheli nënvizuan faktin që ai ka një karrierë të gjatë në ushtri, si komandant brigade dhe komandant regjimenti. Në karrierën e tij z. Kuçana është përballur me detyra dhe sfida të vështira, ndër të cilat menaxhimi me sukses i sfidës së rëndësishme të krizës së vitit 1999 gjatë luftës së Kosovës.
Duke shprehur konsideratë të lartë për eksperiencën e gjatë dhe aftësitë menaxhuese të z. Kuçana, Kodheli dhe Gjonaj u shprehën besim plotë që ai do ti përgjigjet më së miri sfidave që paraqet kjo fazë e re qeverisëse në raport me problematikat ekzistuese dhe pritshmëritë e qytetarëve. Në fjalën e tyre Ministrja e Drejtësisë ashtu si edhe Deputetja e Qarkut Kukës, znj Kodheli theksuan që institucioni i prefektit është ura lidhëse midis Qeverisë dhe institucioneve vendore në qark.
Nga ana tjetër, institucioni i prefektit do të koordinojë, kontrollojë dhe do të jetë në gadishmëri për të përballuar çdo emergjencë civile. Në fjalën e tyre përmbyllëse Ministrja e Drejtësisë dhe Kodheli, duke i uruar sukses për detyrën e re si prefekt i qarkut Kukës, në emër të Qeverisë dhe Ministrisë së Drejtësisë, siguruan edhe një herë se do të ofrohet i gjithë bashkëpunimi i nevojshëm për realizimin me sukses të detyrave përmes institucioneve ligjzbatuese në qark.
