Ministri i Mbrojtjes, Ermal Nufi, ka komentuar zhvillimet e fundit në Samitin e NATO-s të zhvilluar në Ankara, ku u konfirmua se takimi i ardhshëm i aleancës do të mbahet në Tiranë.
Në një intervistë të shkurtër për emisionin “World News”, në Klan News, ministri foli për rëndësinë e këtij organizimi për vendin, si dhe për sfidat që sjell rritja e shpenzimeve të mbrojtjes sipas objektivave të reja të aleancës.
Nufi, e cilëson vendimin për zhvillimin e Samitit të ardhshëm të NATO-s në Tiranë si një përgjegjësi të madhe dhe një vlerësim për Shqipërinë. Ai thekson forcimin e unitetit të aleancës dhe angazhimin e vendit për përmbushjen e objektivave të NATO-s.
“Është përgjegjësi e jashtëzakonshme, është kënaqësi e jashtëzakonshme. Sot u zhvillua një samit tejet i rëndësishëm në Ankara. Fryma dhe uniteti i aleancës është më i madh se kurrë. Vendimmarrjet që lidhen jo vetëm me shpenzimet ushtarake, jo vetëm me angazhimin ushtarak të aleancës, por edhe me qëndrimet politike të aleancës janë shumë të forta. Fakti që Samiti i ardhshëm u konfirmua se do të zhvillohet në Tiranë, është një përgjegjësi e jashtëzakonshme, por patjetër është edhe një vlerësim për stabilitetin e qeverisë në Tiranë, një vlerësim për punën dhe angazhimin e qeverisë shqiptare në përmbushjen e të gjitha objektivave që lidhen me anëtarësimin tonë në NATO”, u shpreh ai.
Shqipëria aktualisht përmbush objektivin prej 2% të Prodhimit të Brendshëm Bruto për shpenzimet e mbrojtjes, por pas vendimeve të fundit të NATO-s, vendet anëtare kanë marrë angazhimin për ta rritur këtë nivel deri në 5%.
Për një vend me përmasa si Shqipëria, ky është një objektiv sfidues që kërkon rritje të ndjeshme të investimeve në mbrojtje. Si do të përmbushet ky angazhim dhe sa e vështirë do të jetë për Shqipërinë të arrijë nivelin e ri të shpenzimeve të kërkuara nga aleanca?
“Ne kemi një rritje në buxhetin e Ministrisë së Mbrojtjes dhe shpenzimet e mbrojtjes. Edhe me aktin e fundit normativ, sot që flasim shpenzimet e mbrojtjes që lidhen me core defence, pra që lidhen me çështjet e mbrojtjes, janë 2.2% e PBB-së dhe janë edhe 0.4% që lidhen me defence-related shpenzime, pa llogaritur këtu edhe shpenzime të tjera që qeveria shqiptare ka te qendrat kibernetike apo te infrastruktura kritike. Pra, ne jemi shumë afër përmbushjes së asaj që quhet credible path, një shteg i besueshëm drejt arritjes së 5% të angazhimit të Samitit të Hagës, samitit të vjetshëm, i cili është një angazhim shumë i fortë politik dhe ushtarak, që nuk po e ndërmerr vetëm Shqipëria, po e ndërmarrin të gjitha vendet e NATO-s. Sot siguria botërore ka ndryshuar, nuk jemi më në kushtet e mëparshme dhe është e nevojshme jo vetëm që të kemi infrastrukturë ushtarake dhe të kemi kapacitete ushtarake të vendosura në Republikë, por të kemi një qëndrim të përgjithshëm sa më të fortë dhe sa më të përputhshëm me të gjitha vendet anëtare të NATO-s. Është e vështirë. Patjetër që ka goxha angazhim, por besoj se do t’ia dalim. Kemi mbështetjen e plotë të qeverisë shqiptare. Investimet që do të ndodhin te Mbrojtja tani e në vazhdim janë investime të jashtëzakonshme që lidhen me sigurinë kombëtare. Patjetër, tek ato bëjnë pjesë edhe shpenzime që janë të lidhura me mbrojtjen, siç janë infrastruktura kritike, infrastruktura e mbrojtjes, por jemi shpresëplotë që gjithçka do ta arrijmë”, tha ai.
Ministri i Mbrojtjes e vlerësoi zhvillimin e Samitit të ardhshëm të NATO-s në Tiranë si një promovim dhe vlerësim për Shqipërinë, duke theksuar unitetin dhe forcën e aleancës në përballjen me sfidat e sigurisë globale.
“Është promovim për Shqipërinë. Është vlerësim për Shqipërinë. Ne kishim një samit të fundit në Tiranë, i cili ishte i jashtëzakonshëm. Besoj që Samiti i NATO-s do të jetë gjithashtu sukses. Patjetër që është vlerësim për Republikën e Shqipërisë. Besoj që nuk vendosen rastësisht samitet. Kishte një qëllim pse samiti u vendos në Ankara. Patjetër që ka një mesazh tjetër me samitin që do të zhvillohet në Tiranë. Aleanca është aty, është e fortë për të gjitha vendet, si për vendet e forta, si për vendet që janë më të vogla, por ama të gjithë së bashku, sot që flasim, është aleanca më e fortë ushtarake në botë dhe mesazhi që jepet është i qartë për të gjithë: që NATO është e unifikuar si kurrë më parë dhe po rrit të gjitha shpenzimet ushtarake, po rrit të gjitha angazhimet në botë për të shërbyer si faktor paqeje dhe stabiliteti për të gjitha konfliktet në botë”, u shpreh Nufi.
