Pas 14 vitesh mungesë, Festivali Kombëtar i Filmit Shqiptar ka ngritur zyrtarisht siparin në Tiranë për edicionin e tij të 14-të, një ngjarje madhore kulturore që këtë vit sjell Radio Televizionin Shqiptar (RTSH) si partner kryesor mediatik.
Nga data 3 deri më 12 shtator, ky organizim do ta kthejë kryeqytetin në qendrën e kinematografisë, ku rreth 220 filma të prodhuar nga viti 2012 e deri më sot do të shfaqen në katër hapësira të ndryshme: Universitetin e Arteve, Kinemanë Agimi, Piramidën e Tiranës dhe “Film Zone” në sheshin “Nënë Tereza”. Ceremonia e hapjes, e moderuar nga Pandi Laço dhe Marsela Çibiku, u zhvillua në sheshin e Universitetit të Arteve.
I pranishëm në ceremoni, Ministri i Turizmit, Kulturës dhe Sportit, Blendi Gonxhe, vlerësoi punën e Qendrës Kombëtare të Kinematografisë (QKK) dhe theksoi rëndësinë e thellimit të reformave në sektor. Ai njoftoi transformimin e Parkut të Artit në Kinostudio dhe strukturës së “Albafilm” me synim krijimin e Komisionit të Filmit Shqiptar (Albanian Film Commission). Gjithashtu, ai paralajmëroi tre nisma të reja ligjore që pritet të miratohen gjatë vjeshtës për të rritur mbështetjen financiare në art.
“Edicioni i 14-të i Festivalit Kombëtar të Filmit Shqiptar shënon rikthimin e një prej ngjarjeve më të rëndësishme të jetës sonë kulturore. Pas 13 vitesh mungesë, i rikthejmë kinemasë shqiptare skenën që meriton dhe publikut një traditë të çmuar, e cila ruan kujtesën tonë artistike dhe u hap rrugë zërave të rinj. Ky festival është një homazh për mjeshtrit që hodhën themelet e filmit shqiptar, por edhe një premtim për brezin e ri të kineastëve që po ndërton të ardhmen e tij. Nga 3 deri më 12 shtator, Tirana do të bëhet një hapësirë takimi mes brezave, kujtesës dhe krijimtarisë, sepse historitë tona meritojnë të tregohen, të shihen dhe të udhëtojnë përtej kufijve”, shkruan Gonxhja në rrjetin social.
Në këtë edicion, krijuesit do të vlerësohen përmes tre sistemeve: Jurisë Zyrtare, Akademisë së Filmit dhe votës së publikut. Çdo regjisor ka përzgjedhur vetëm një film për konkurrimin zyrtar, ndërsa Akademia dhe publiku do të vlerësojnë të gjitha veprat.
Artistët pjesëmarrës kanë mirëpritur rikthimin e kësaj platforme si një mundësi thelbësore për industrinë. Aktori Klodjan Hoxha, i cili garon me filmat “Internimi” dhe “Burri i Shtëpisë”, e konsideroi festivalin një test të rëndësishëm për kinemanë dhe artistët vendas. Regjisorja Ajola Daja, e cila prezanton filmin “Emili”, ftoi publikun të ndjekë shfaqjet, ndërsa regjisori i ri Renis Hyka merr pjesë në garë me dy filma të shkurtër. Të pranishëm në hapje ishin edhe përfaqësues ndërkombëtarë, si drejtori i Institutit Italian të Kulturës, Alessandro Ruggera, i cili shprehu dëshirën që ky rikthim të konsolidohet si një traditë e përhershme.
Nga data 4 deri më 11 shtator, hyrja për publikun në të gjitha hapësirat e festivalit do të jetë e lirë, teksa RTSH do të përcjellë çdo moment të rëndësishëm në ekran. Ngjarja do të përmbyllet me një natë gala më 12 shtator, ku do të kurorëzohen fituesit me 31 çmime të ndara për kategoritë e ndryshme kinematografike.
