Paraditen e sotme në selinë e Partisë Socialiste është firmosur marrëveshja midis PS dhe partisë së Paskal Milos PDS.
Pas daljes nga takimi Milo u shpreh se PDS do të mbështesë kandidatët e PS në zgjedhjet vendore dhe se ky bashkepunim do vijojë edhe në qeverisjen e njësive administrative.
“Do të kemi bashkëpunim elektoral dhe do të mbështesim të gjithë kandidatët e PS në zgjedhjet lokale. Pas fitores në zgjedhje do të bashkëpunojmë në të gjitha bashkitë”, tha për mediat kreu I PDS Milo.
Ndërsa deputeti i Partisë Socialiste Taulant Balla tha se u nënshkrua marrëveshja me një nga partitë simbol për zgjedhjet e 21 qershorit. Sipas Ballës, Partia Socialiste është në diskutim edhe me kreun e Partisë Social Demokrate, Skënder Gjinushi.
“Jemi në momentin që sapo kemi firmosur marrëveshjen e bashkëpunimit për zgjedhjet e 21 qershorit me një ndër partitë simbol të së majtës shqiptare, sikurse është Partia Demokracia Sociale. Përfitoj nga rasti që në emër të Partisë Socialiste ta falënderoj zotin Milo për kohezionin, për solidaritetin e përbashkët në të gjitha sfidat që kemi përballur në shumë vite me radhë si dy parti të majta. Ndamë të njëjtin vlerësim që zgjedhjet e 21 qershorit janë një moment i rëndësishëm për t’i shndërruar qeverisjet lokale në çdo njësi vendore në njësi zhvillimi për të gjitha komunitetet që ato përfaqësojnë. Kemi gjetur të njëjtin arsyetim dhe të njëjtin mirëkuptim me Demokracinë Sociale që qeverisja vendore pas 21 qershorit të jetë e drejtë, efikase dhe në dobi të qytetarëve.” tha Balla
Redaksia Online
(Javanwes.al)
