Familja e Millie Bobby Brown dhe Jake Bongiovi është zgjeruar sërish. Pas ardhjes së një vajze në gusht 2025, çifti ka adoptuar edhe një djalë.
Lajmin e bëri të ditur vetë aktorja e Stranger Things, e cila publikoi në Instagram një foto të ëmbël ku shihet dora e vogël e një të porsalinduri teksa kap gishtin e saj. Në dorën e Millie-t dallohet edhe një unazë me mbishkrimin “mom”.
“Përshëndetje, vogëlush”, shkroi ajo thjesht në përshkrimin e fotos.
Prej disa ditësh në rrjet qarkullonin zëra se familja mund të ishte zgjeruar. Dyshimet u shtuan pas një fotografie të publikuar nga Millie gjatë pushimeve familjare në Dolomite. Në imazh, ajo mbante në krahë vajzën e tyre, ndërsa Jake kishte vendosur një marsup bebesh.
Sipas People, edhe fëmija i dytë i çiftit ka ardhur në familje përmes adoptimit, një rrugë për të cilën Brown ka folur prej kohësh dhe që e ka përshkruar si pjesë të ëndrrave të saj që në fëmijëri.
“Adoptimi ka qenë gjithmonë pjesë e ëndrrave të mia”, tregonte ajo në qershor 2026 në podcast-in Not Gonna Lie with Kylie Kelce. “Kur isha pesë apo gjashtë vjeç, prindërit e mi më thoshin se të gjitha kukullat e mia ishin të adoptuara. Nuk kam pasur kurrë një kukull që ta konsideroja timen dhe as nuk kam bërë sikur isha shtatzënë.”
Megjithatë, aktorja ka sqaruar se kjo nuk do të thotë se ka hequr dorë nga ideja e një shtatzënie në të ardhmen.
“Shpresoj që një ditë kjo të ndodhë edhe në jetën time”, ka thënë ajo.
Dy fëmijë dhe një privatësi që duan ta mbrojnë
Millie Bobby Brown dhe Jake Bongiovi u njohën në vitin 2021 dhe u martuan në vitin 2024. Që prej fillimit, të dy kanë folur hapur për dëshirën për të krijuar një familje.
Por në një pikë kanë qenë po aq të qartë: fëmijët e tyre nuk do të rriten nën vëmendjen e publikut vetëm sepse prindërit e tyre janë të famshëm.
Emri i vajzës së tyre të parë nuk është bërë publik dhe fytyra e saj nuk është shfaqur në rrjetet sociale. E njëjta zgjedhje pritet të ndiqet edhe për djalin.
Në një intervistë për British Vogue në dhjetor 2025, Millie kishte shpjeguar arsyen.
“Për mua është shumë e rëndësishme ta mbroj atë dhe historinë e saj derisa të jetë mjaftueshëm e madhe për të vendosur vetë nëse dëshiron ta ndajë një ditë. Nuk është detyra ime ta vendos qëllimisht në qendër të vëmendjes kundër dëshirës së saj.”
Ajo shtonte se nëse vajza e saj, kur të rritet, do të zgjedhë të ketë një jetë publike, prindërit do ta mbështesin. Por deri atëherë, detyra e tyre është ta mbrojnë.
“Kur takon personin e duhur, e kupton”
Brown ka folur edhe për kritikat që ajo dhe Jake kanë marrë për faktin se u martuan dhe krijuan familje shumë të rinj. Ajo ishte 20 vjeçe dhe ai 21 kur u martuan.
“E di që jam e re, por nuk lodhem duke e thënë: kur takon atë person, e kupton”, ka treguar ajo, duke e përshkruar Jake si “një engjëll të mrekullueshëm” dhe “një baba të jashtëzakonshëm”.
Sipas saj, mes tyre ka pasur që në fillim një dakordësi të natyrshme për mënyrën si e imagjinonin familjen.
Në videopodcast-in On Purpose të Jay Shetty-t, në korrik 2026, Millie tregoi se Jake kishte qenë i përfshirë që nga fillimi në procesin e adoptimit të vajzës së tyre të parë.
“Ndoshta për këtë arsye u martova me të”, tha ajo. “Ndonjëherë, kur je me dikë, duhet t’i tregosh kush je dhe ai duhet të të tregojë kush është. Me ne nuk ishte kështu. Ishim në të njëjtën gjatësi vale, nuk kishte nevojë për shpjegime.”
Dhe pikërisht kjo ishte ideja e tyre për familjen.
“Të dinim se të dy donim të krijonim një familje të ndërtuar mbi dashurinë, por përmes adoptimit, ishte diçka vërtet e veçantë.”
Tani ajo familje është bërë me katër anëtarë./Class
