Në një intervistë për emisionin FAKT, Ilir Meta u rikthehet raporteve me Edi Ramën.
I pyetur për “darkën e ngjalave”, ku thuhet se u vendos fati i koalicionit të 2013-s, dhe për darkën e kohëve të fundit me Ramën në Durrës, Meta thotë:
“Ngjala asnjëherë nuk ka qenë pjesë e menysë së pari. Ai është një takim normal. Ne takohemi, komunikojmë në mënyrë të vazhdueshme, nuk përbën ndonjë lajm. Nuk kemi patur mundësinë për të patur një darkë së bashku, por kemi ndenjur për një kohë të konsiderueshme dhe kryesisht kemi konsumuar fruta të freskëta…”
Kreu i LSI pyetet edhe për zërat se ai është shantazhuar me burg.
“Nuk besoj, edhe një herë tjetër, se vërtet kanë lindur ata njerëz që mund të kenë një guxim të tillë. Po kështu nuk është ndonjë sekret që indirekt vazhdimisht është përmendur, apo është pëshpëritur se kjo reformë bëhet kundër këtij, kundër atij, dhe nuk është ndonjë sekret që është thënë që është bërë edhe kundër Metës. Ndërkohë që Metën këtu e kanë dhe do ta kenë gjithmonë qytetarët shqiptarë pasi Meta nuk e ka në plan të iki të jetojë në ndonjë ishull apo as në ndonjë vend tjetër. Ka vendosur të jetë jetojë këtu në Shqipëri dhe të ndajë çdo gëzim dhe çdo vështirësi me qytetarët e këtij vendi” – thotë Meta.
