Kreu i Kuvendit, Ilir Meta, i ftuar në emisionin Arena të gazetarit Dritan Hila, i ka kthyer përgjigje akuzave që ish-ministri i Brendshëm, Saimir Tahiri, bëri kundër tij.
Meta tha se Tahiri nuk është shkarkuar për faj të LSI-së, por për shkak të marrëzisë së tij. Meta e mohoi akuzën e Tahirit se i kishte vendosur përgjues në zyrë.
“Që unë të merrem me Sajen është humbje kohe, e dinë të gjithë pse është shkaktar dhe nuk është shkarkuar nga LSI. Është e tepërt. Edhe vetë në PS, nga kolegët e tij në qeveri dhe grupin e tij parlamentar e kanë të qartë që ai është një viktimë e marrëzisë së tij por edhe ..
Tahiri i kapur peng? Peng është pak. Ai është zgjedhur në atë detyrë nga kreu i mavisë vetëm për tu keqpërdorur jo vetëm ndaj LSI, se kjo nuk ka lidhje me LSI, por dhe ndaj kolegëve të tij në PS si mënyrë e paligjshme. Çështja e përgjimeve nuk është e pavërtetë, përkundrazi. Është çështje shumë serioze”, tha Meta.
Pas shkarkimit të zv.ministrit të Brendshëm, Ilir Marko, të cilin Tahiri e quajti ‘hafije të Metës’, Marko reagoi duke i thënë Tahirit se shkarkimi nuk erdhi nga LSI-ja por nga faktori ndërkombëtar.
Meta tha dje se kjo akuzë është shpikje.
“Nuk e di atë çështje, di që në momentin që u krijua kriza e çështjes së përgjimeve me këtë pajisjen që u fsheh në Ambasadën e një vendi partner që kishte ardhur në mënyrë të paligjshme në Shqipëri dhe që ishte përdorur realisht nga policia, në atë kohë u krijua një situatë sikur zv.ministri i Brendshëm kishte përgjuar ministrin e Brendshëm, zv.ministri i LSI që në fakt ishte komplet një shpikje e Sajes.
Qëndrimi im që në momentin që më është thënë ka qenë ky që ja kam thënë dhe Sajes, kryeministrit dhe partnerëve të ndryshëm kur më kanë pyetur për këtë çështje: Të bëhet hetim ndërkombëtar për këtë çështje, nëse një zv.ministër ka përgjuara Ministrin, të marrin dhe ekspertë nga FBI, Gjermania apo ndonjë vend tjetër meqenëse ky zv.ministri ka dhe shtetësi amerikane. Nëse është e vërtetë të shkojë në burg, jo të shkarkohet”, tha Meta.
Etiketimin e Tahirit për LSI-në si ‘kotele’, Meta u përgjigj duke thënë se Tahiri merr substanca të cilat i japin fuqi artificial.
“Ai duhet të bëjë ndonjë kontroll përveçse shëndetësor edhe për substanca që të japin një fuqi artificiale. Pastaj le të merret me LSI se LSI nuk ka kohë të merret me të. Nuk ka kohë as partia e tij”,tha Meta.
