Kryetari i Kuvendit Meta mori pjesë në inaugurimin e fabrikës së prodhimit të konfeksioneve “Citytex” në Cërrik. Kryetari i Kuvendit u shpreh se edhe për të ardhmen sfida mbetet kualifikimi dhe hapja e vendeve të reja të punës në mënyrë që çdo familje të ketë mundësi që të ecë e sigurt për të ardhmen. 
“Unë gjithmonë mbështes arritjet qofshin ato dhe modeste, por të prekshme dhe të arritshme të cilat ndihmojnë qoftë edhe një familje të vetme që të përballojë me punë dhe me dinjitet koston e vështirë të jetesës dhe të dalë nga varfëria sepse nuk jam partizan i sukseseve imagjinare të cilat nuk janë aq të thjeshta për t’u prekur dhe për t’u realizuar… Përshëndes Kryetarin e Bashkisë së Cërrikut për punën dhe angazhimin e tij, për shpirtin praktik dhe sipërmarrës. E di që ai po bashkëpunon dhe në fusha të tjera për të nxitur krijimin e aktiviteteve që hapin vende të reja të punës. Kjo është beteja jonë kryesore. Të hapim qoftë edhe një vend të ri pune për një grua, për një të ri, për një të re, t’i kualifikojnë në mënyrë që vërtet çdo familje e Cërrikut dhe çdo familje shqiptare të ketë mundësi që të ecë me siguri për të ardhmen”, – tha z. Meta.
Gjithashtu, z. Meta shprehu angazhimin për një mbështetje edhe më të madhe nga ana e institucioneve shtetërore për rritjen e iniciativave të tilla. 
“E dimë që kjo nuk është puna më e mirë, por padyshim që është një mundësi shumë më e mirë për të hedhur një hap përpara dhe padyshim që do të punojmë për të krijuar edhe mundësi të tjera. Por njëkohësisht kjo do të shkojë edhe paralelisht me përpjekjet tona për t’i kualifikuar, për t’i trajnuar të gjithë ata të cilët duan të punojnë dhe duan të jetojnë me djersën e ballit dhe me dinjitet për të përballuar jetën e tyre dhe mirë edukimin e fëmijëve të tyre. Mbështetja jonë do të jetë edhe më e madhe dhe më konkrete dhe urojë që të gjithë kryetarët e pushtetit vendor, pas reformës administrative territoriale, punësimin ta kenë një prioritet të tyre dhe të krijojnë mundësi dhe hapësira sa më të mira për sipërmarrësit që të marrin jetë iniciativa të tilla”, – theksoi z. Meta.
Aktualisht ky biznes fason ka të punësuara rreth 100 vajza dhe gra të punësuara dhe brenda këtij viti ky numër pritet të shkojë në 200 të punësuar. Të gjitha prodhimet e fabrikës “Citytex” eksportohen jashtë vendit./java/a.k
