Opozita dhe Partia e Lirisë mbeten e shkuara, prioritet është e ardhmja dhe fushata elektorale pas përfshirjes si kandidat në listat e hapura të Partisë Socialiste.
Për Endrit Brahimllarin, e kaluara e tij tek Partia e Lirisë ka mbetur në të shkuarën dhe gjithashtu kryetari i saj Ilir Meta, që edhe pse e ka akuzuar, shprehet se koha do e zbardhë të vërtetën se ato nuk qëndrojnë.
I ftuar në “Studio Live” të Report Tv, kandidati i mazhorancës për Tiranën tha se PS nuk e diskuton mazhorancën e thjeshtë në këto zgjedhje, pasi kërkon një fitore të thellë për t’i dhënë shqiptarëve pasaportën europiane dhe anëtarësimin në BE.
Për opozitën ai u shpreh se është mbyllur në lista me kandidatë besnik apo të besuar të kryetarëve dhe emrat e tyre tregojnë qartë se opozita nuk lufton për rotacion dhe kauza, por që të ruajë pozicionet e saj aktuale.
“Ka kohë që nuk i dëgjoj më, nuk kam as interes, jam fokusuar te e ardhmja dhe qytetarët dhe të shkuarën e kam lënë me të shkuarën. Akuzat e Metës? E thashë se nuk merrem me të shkuarën. Por duke u përgjigjur, me përgjegjësinë maksimale nuk kam asnjë lidhje me akuzat e Metës. Të jemi të duruar dhe të presim se do jetë e qartë se kush është përfshirë dhe kush jo në ato çështje”, shprehet Brahimllari për moderatorin Arbër Hitaj.
Ai e cilësoi PS-në si një makineri elektorale dhe afrimi me mazhorancën erdhi pas sinjaleve që partia dha ndaj gjeneratës së re, teksa 60% e emrave në parlamentin e ardhshëm do jenë pikërisht të rinj.
“Tani ndihem mirë, kam nisur fushatë, ndihem edhe borxhli njëkohësisht për atë që ka kaluar. Objektivi është tejkalimi i rezultatit të zgjedhjeve të kaluara. PS ka vendosur objektiv ambicioz, pasi nëse duam të mbyllim negociatat dhe anëtarësimin në BE duhet pjesëmarrje dhe votim e mbështetje masive, përtej të majtës e të djathtës, për të siguruar edhe pasaportën europiane. Nuk është risi ta them tani se PS është makineri elektorale, e organizuar dhe disiplinuar, që punon çdo ditë, të angazhuar dhe në komunikim me qytetarët. PS është ambicioze dhe hyn në avantazh, sepse ka kombinuar listat për fitore të thellë në të gjitha qarqet. Përfshirja e gjeneratës së re dhe objektivit europian do sjellin rezultate. Por edhe figurat e vjetra të PS janë në terren për sigurim të votave”, vijon ai argumentin politik për fushatën dhe listat.
Kurse për opozitën ndau mendimin se ajo është mbyllur te listat e mbyllura, pa ambicie për rotacion dhe pa kauza, duke larguar edhe figurat emblematike të saj, që mund ta ndihmonin.
“Në anën tjetër opozita ka vendosur lista të konceptuara në atë mënyrë që të mbrojnë rolin e tyre në opozitë, por jo rotacion politik. Nëse do të donin rotacion do kishte figura publike që mbrojnë kauzën e opozitës dhe ata nuk janë përfshirë. Sinjalet nga PS për gjeneratën e re dhe përfshirjen e të rinjve ishin përcaktuese edhe për mua. PS është hapur për të gjithë, ka rritur bazën e përfshirjes, përtej të majtës dhe të djathtës. Kurse opozita është mbyllur në listën e mbyllur, emrat dhe jo kauzën. Kurse PS po çon edhe emra të rinj në Parlament, ku 60% do të jenë figura të reja, i lexon opinionet, reflekton dhe i përgjigjet qytetarëve”, thotë Brahimllari për Report Tv.
Për të, opozita nuk reflekton pas humbjeve të përsëritura dhe kjo krijon një situatë jo të përshtatshme në raport me qytetarin. Sipas tij, kryetarët i bëjnë listat me njerëz të besuar të tyre.
“Kam qenë pjesë e atij fronti, kam mbrojtur dhe dhënë mesazhet. Kur shikohet se humbet një herë, dy herë e më tej duhet reflektuar. Nuk e sjell mbyllja rotacionin, duhet të hapet, të reflektohet. Lista për deputetë nuk konceptohet mbi bazën e besimit që ke ndaj individit. Ose fut përfaqësues që nuk kanë vota”, nënvizon ish-përfaqësuesi i PL-së, që tashmë garon me mazhorancën në zgjedhjet e 11 majit.
