Presidenti Ilir Meta ka dalë sot në një deklaratë për publikun, teksa ka shprehur qëndrimin e tij në lidhje me situatën epidemike.
Meta tha se për trajtimin e të prekurve me COVID-19 duhen vënë në dispozicion të gjitha mjetet dhe kushtet e nevojshme. Ndërkohë, presidenti ‘habiti’ jo pak teksa tha se institucionet janë në gatishmëri të plotë.
“Nuk ka vend për panik, por as për nënvlerësimin që mund t’I bëjë situatës institucionet apo qytetarët. Kërkohet profesionalizëm, transparencë dhe bashkëpunim. Unë mbështes fuqimisht të gjithë personelin shëndetësor që është vendosur përballë një sfide madhore” – tha presidenti.
Ai shtoi se duhen plane të detajuara dhe përgjegjësi të plota në terren, shkruan JavaNews.
“Apeloj për financimin e të gjithë personeleve të angazhuara, në mënyrë që të përballojmë me sukses pandeminë” – tha Meta.
Kreu i shtetit, raporton JavaNews, tha se të gjitha palët duhet të bashkohen për të përballuar luftën kundër koronavirusit.
I pyetur nëse duhet mbledhur Këshilli i Sigurisë Kombëtare, Meta tha se kjo nuk është e nevojshme. Ai shtoi se i vlerëson masat e marra sot nga qeveria.
“Qeveria ka marrë masat në këtë drejtim. Unë jam në kontakt me institucionet dhe nga dita e sotme, edhe në Presidencë, kemi një task-forcë. Do të kemi edhe një adresë për personat që kërkojnë kujdesin e duhur. Kam besim se do ta kemi situatën në kontroll. Kam folur me ambasadorët në Romë dhe Athinë. Unë besoj se të gjithë do të bëjmë më të mirën” – tha Meta.
/JavaNews/a.r
