Prej tri ditësh, hoxha Zekerija Bajrami nga Maqedonia e Veriut është angazhuar në rrjetet sociale me postime për protestat në Shqipëri, duke shprehur mbështetje për studentët dhe duke përdorur gjuhë të ashpër ndaj atyre që i konsideron armiq të vendit fqinj.
Por përfshirja e tij në zhvillimet politike të Shqipërisë ngre si gjithnjë debatin për ndërthurjen e autoritetit fetar me qëndrimet politike, veçanërisht kur mesazhet përcillen nëpërmjet lutjeve dhe referencave ndaj Zotit.
Bajrami nuk është nga Shqipëria. Ai vjen nga fshati Bojanë i Shkupit, në Maqedoninë e Veriut, ku ka zhvilluar një pjesë të madhe të veprimtarisë së tij fetare.
Megjithatë, protestat kundër qeverisë së Edi Ramës duket se kanë marrë vëmendjen e tij të veçantë.
Në njërin prej postimeve, ai kërkon ndihmën e Zotit për studentët, ndërsa flet për njerëz që, sipas tij, e keqpërdorin Shqipërinë për interesa personale.
“Zoti ynë, ndihmoi studentët dhe ata që duan drejtësi në Shqipëri, mbroje Shqipërinë nga ata që nuk e duan dhe nuk e ruajnë atë, ata që e keqpërdorin atë për interesa të veta”, ka shkruar Bajrami.
Në një tjetër postim, gjuha e tij bëhet edhe më e ashpër.
“Zoti ynë, studentët, dhe dashamirët e vatanit ndihmoi. Nga kurthet e kriminelëve mbroi. Zullumqarët mes vete shkatërroi”, shkruan ai.
Postimin e përfundon me mallkime dhe lutje.
“Zoti i mallkoftë tradhëtarët. Zoti i ruajtë Shqipëtarët. Zoti e bekoftë Shqipërinë”.
Megjithëse nuk e përmend shprehimisht kryeministrin Edi Rama, postimet vijnë në kohën kur protestuesit kërkojnë largimin e tij nga pushteti.
Kjo e vendos angazhimin e hoxhës me 100 mijë ndjekës në “Facebook”, në një kontekst të qartë politik, pavarësisht se mesazhet janë formuluar si lutje fetare.
Pikërisht këtu lind debati për kufirin ndërmjet predikimit fetar, aktivizmit politik si dhe përdorimit të lutjeve e mallkimeve, por me mesazhe here të fshehta e here të dukshme politike.
Një imam, sikurse çdo qytetar tjetër, gëzon të drejtën e shprehjes dhe të qëndrimit politik. Por kur qëndrimet politike artikulohen përmes autoritetit fetar, ato marrin një peshë tjetër për besimtarët që e ndjekin.
Përdorimi i lutjeve për të ndarë njerëzit në dashamirë të atdheut, tradhtarë dhe zullumqarë ngre pyetjen nëse një përplasje politike po trajtohet edhe si çështje e së mirës dhe së keqes në kuptimin fetar.
Kush është Zekerija Bajrami?
Bajrami është një ligjërues islam me shkollim në institucione fetare jashtë Maqedonisë së Veriut.
Ai ka ndjekur Medresenë “Alauddin” në Prishtinë, ndërsa studimet universitare i ka përfunduar në Universitetin Al-Azhar në Kajro, rreth vitit 1980.
Në vitin 1984 ka përfunduar edhe studimet e magjistraturës në Universitetin e Kajros.
Zekerija Bajrami është gjithashtu babai i hoxhës Omer Bajrami, një tjetër ligjërues islam nga Shkupi, i cili ka studiuar në Egjipt dhe ka zhvilluar veprimtari fetare në Maqedoninë e Veriut. Kjo lidhje familjare konfirmohet edhe nga biografia zyrtare e Omer Bajramit.
Ndërkohë, në një prej postimeve të fundit për Shqipërinë, Zekerija Bajrami ka shprehur shqetësimin për mundësinë e një konflikti të brendshëm.
