Liderët e Gjermanisë dhe Francës ranë dakord për të krijuar një buxhet për Eurozonën dhe bënë thirrje për një “kapitull” të ri për unionin e valutës, megjithatë, detajet i lanë që të përpunohen me vendet e tjera anëtare.
Takimi i tyre, që synonte parapërgatitjen për samitin e 28 Qershorit, është quajtur si momenti i të vërtetës për marrëdhëniet dypalëshe nga ministri francez i Financave, Bruno le Maire, ndërkohë që Parisi i ka bërë thirrje prej kohësh Berlinit për të rënë dakord mbi reformat që synojnë mbrojtjen e bllokut nga krizat.
Pas takimit, Merkel dhe Macron e prezantuan buxhetin e ri si një mënyrë për të nxitur konkurrueshmërinë ekonomike të bllokut. Macron tha se do të jetë operacional deri në vitin 2021, por planet e tyre nuk sollën detaje të tjera. “Ne po nisim një kapitull të ri”, tha Merkel pas bisedimeve, që gjenerua një deklaratë prej 8 faqesh që titullohej: “Rinovimi i premtimeve të Europës për siguri dhe prosperitet”.
Merkel tha se buxheti do të përdoret për të fuqizuar konvergjencën ekonomike brenda Eurozonës, që thuajse u shpërbë gjatë krizës së borxhit pas vitit 2009.
“Unioni ekonomik dhe monetar mund të qëndrojë i fortë vetëm nëse politikat ekonomike janë konvergjuese”, tha Merkel duke shtuar se reformat në Eurozonë ishin çështjet më të vështira gjatë bisedimeve, që përfshinë gjithashtu politikat e jashtme dhe të mbrojtjes të Europës si dhe emigrimin.
“Do të jetë një buxhet real, me të ardhura dhe shpenzime vjetore. Ky është një angazhim politik që bëjmë së bashku, që do të kërkojë punë teknike në nivel ministror deri në fund të vitit si dhe një ndryshim të domosdoshëm të traktatit vitin e ardhshëm”, tha Macron.
Kontributet kombëtare dhe burimet në Europë do të përdoren për të financuar buxhetin, deklaruan liderët e 2 ekonomive më të mëdha të rajonit.(scan)
ma.me
