Nga Erion Braçe/
Izet Haxhia ka qenë një njeri i rëndësishëm në qeverisjen e parë të Berishës si President, por po kaq i rëndësishëm për ngjarjet që pasuan pas ikjes së tij nga pushteti, daljes në opozitë dhe, përpjekjes për destabilizim permanent në Shqipëri.
Ai është dëshmitar! Ka qenë aty në mes të ngjarjeve. Ndaj kam lexuar çdo gjë që po thotë në harkun e një viti e ca. Por një pyetje e kam: Mirë unë që bëj lexuesin, po agjencitë ligjzbatuese të shtetit a lexojnë?
Policët që merren me hetimin e krimeve të vjetra, të hetuara keq qëllimisht apo të pa hetuara fare, a lexojnë?
Prokurorët që kanë drejtuar këto hetime, qëllimisht të cungeta apo edhe nga frika, presioni politik apo cilado arsye tjetër, a lexojnë? A nuk i ngacmon gjë në pjesën e tyre profesionale për të plotësuar apo korrigjuar tërësisht hetimet e tyre dhe ngritur akuzat e duhura?
Gjykatësit që mbi hetimet, akuzat e provat gjithnjë të cungëta kanë dhënë vendime që nën dritën e dëshmive të sotme provohen qartësisht si të tilla, a lexojnë?
Sot është 12 shtator dhe, meqë Lulzim Basha kujtoi sërish, vendosur nën një kontekst të ri, atë që i duhet, Azem Hajdarin.
Të gjithë këta nuk e ndjejnë si detyrim të hetojnë deri në fund çdo detaj që ja bën muuu që nuk është hetuar mbi vrasjen e Azem Hajdarit?
Kam 17 vite, që nga mbrëmja e 12 shtatorit që dëgjoj për telefonin e Azem Hajdarit. Policë, prokurorë e gjykatës a nuk duhet të jepni një përgjigje për ketë?
Berishën, zyrën e tij, njerëzit që ishin në të, thirrjen prej tij të Hajdarit dhe dërgimin në rrugë, aty ku ndodhi përplasja dhe vrasjet e plagosjet, policë, prokurorë e gjykatës a nuk duhet të jepni një përgjigje për rolin e tij, të Berishës, tamam në ato minuta?
Sot ka një dëshmi të përsëritur se është ai që e nxori Hajdarin aty,
madje duke e ditur se kush ishte në makinë e rrugë, pra me vetëdije të plotë. A nuk duhet të verifikohet kjo dëshmi e nëse rezulton e vërtetë, a nuk duhet të kërkohet përgjegjësia ligjore e Sali Berishës?
Për 17 vite me radhë, Sali Berisha dhe cilido deri tek ky qurrashi i sotëm që atë kohë s’dihej ku ishte, kanë në majë të gjuhës:
E vrau pushteti i atëhershëm (ai i PS-së) i lidhur me krimin;
Një jetë që na bëjnë përgjegjës për një vrasje që lindi në zyrën e Berishës, u nxor prej andej nga Berisha e u konsumua tërësisht për të, siç del qartë nga dëshmitë e fundit e të përsëritura nga një dëshmitar kyç, Izet Haxhia.
Po mirë, kaq pak, zbardhjen nën dritën e këtyre dëshmive e fakteve, nuk mund të bëhet?
Jo që këta të mos kujtojnë si çdo vit Azem Hajdarin, por që gjithkush të ketë të vërtetën e plotë të asaj vrasje së bashku me ndëshkimin e gjithkujt të përfshirë në të! Unë jam i bindur që Berisha e Basha e duan këtë. A nuk po e kthejnë ata në aksion politik “dëshminë” e plotë me “më the e të thashë, ma tha dhe ja thashë” dhe pa asnjë provë, a thua se nuk flet një ish-polic, por një gojtar, duke kërkuar hetimin e një ministri?
Po dëshminë e Izet Haxhisë si ka mundësi që nuk e lexon kush, nuk e heton kush, nuk e provon kush dhe as nuk e hedh poshtë ndonjëri prej këtyre?!
