Real Madrid ka ndryshuar traditën e prezantimeve pompoze dhe ceremonive me mijëra tifozë në stadium.
Klubi madrilen ka vendosur që të gjitha prezantimet e reja të bëhen me ceremoni private në ambientet e Valdebebas dhe ka filluar ato të merkatos së verës me Zhoze Murinjon.
Në ceremoninë e sotme ishte i pranishëm presidenti Florentino Perez dhe presidenti i nderit Hose Martinez Pirri, të cilët panë teknikun duke nënshkruar marrëveshjen që do e mbajë në klub deri qershor 2029.
“Ky është si një kthim në shtëpi. Emocionalisht, është edhe më e veçantë se hera e parë sepse atëherë bëhej fjalë për arritjen e majës së skenës botërore, dhe tani është një përvojë më emocionale dhe e përzemërt. Unë jam një nga ju, gjithmonë kam qenë, dhe mund ta imagjinoni se çfarë do të thotë për mua të punoj për Real Madridin. Ky është një parim që të gjithë duhet ta ndjekin: të punosh për Real Madridin, që do të thotë të punosh për ju”, tha trajneri portugez pas prezantimit.
Ky është mandati i dytë i Murinjos në krye të skuadrës. Periudha e tij e mëparshme, nga viti 2010 deri në vitin 2013, rezultoi në një titull të La Liga, një Kupë të Mbretit dhe një Superkupë Spanje.
“Fjalët nuk janë të mjaftueshme… sepse është si një mision. Nuk ka të bëjë me shqetësimin për veten time apo nëse do të fitoj shumë apo pak. Jam këtu për t’i ndihmuar të gjithë të jenë më të mirë: lojtarët, stafin… Për të krijuar një kulturë pune, përgjegjësie, ambicieje dhe diçkaje që e di mirë, që është përgjegjësia dhe nderi i punës për Real Madridin. Më pëlqen shumë ky koncept,” tha ai.
Prezantimet e Kukureja, Bernardo Silva, Konate, Dumfris, Karlos Espi dhe Diomand do të zhvillohen në ditët në vijim, me të njëjtin format ceremonie si ai i Murinjos.
