SPAK ka ndërmarrë një operacion ditën e sotme në qytetin e Elbasanit. Mësohet se gjyqtarja Zamira Vyshka akuzohet për korrupsion dhe për të është ekzekutuar masa e sigurisë “arrest shtëpie.”
Ndërkohë sipas njoftimit të SPAK, është ekzekutuar masa e sigurisë “arrest me burg” për avokatin Ilir Pashaj dhe shtetasit Taulant Ramollari e Xhulio Musaj.
Në arrest shtëpie është lënë edhe shtetasi A.T.
Fakti penal i hetuar, lidhet me një rast të korrupsionit aktiv/pasiv në sistemin e drejtësisë në qytetin e Elbasanit, ku persona të interesuar/familjarë të një shtetasi të arrestuar në bashkëpunim me avokatin mbrojtës (Ilir Pashaj), i kanë ofruar gjyqtares Zamira Vyshka një shumë monetare me qëllim favorizim në caktimin e masës së dënimit.
Arrestimi i gjyqtares dhe avokatit pas përgjimeve dhe vëzhgimeve nga ana e SPAK. Burime bëjnë me dije se avokati Ilir Pashaj u tha familjarëve se do i ulte të dënuarit 6 muaj burg për 200 mijë lekë. Pas takimit me gjyqtaren kërkoi 400 mijë lekë, por familjarët e kundërshtuan.
Nga përgjimet ka rezultuar se familjarët e të dënuarit i kanë thënë avokatit: Më mirë t’i hajë ai 400 mijë lekë në burg se sa gjyqtarja.
Xhulio Musaj, i arrestuar në Elbasan u ofroi gjyqtares dhe avokatit në Elbasan shumën 400 mijë lekë për të zbutur dënimin e tij. Në vitin 2019 Xhulio Musaj isht ei përfshirë në vjedhjen e një makine.
Avokati Ilir Pashaj ka qenë gjyqtar në Elbasan por u largua nga sistemi para vettingut për mos plotësim të formularit të deklarimit. Prej 4 vitesh ushtron detyrën e avokatit.
g.kosovari
