Beteja me kajakë në mbrojtje të lumenjve të Ballkanit ka nisur të dielën në lumin Valbona. Ndërkohë që 2.700 hidrocentrale janë parashikuar të ndërtohen që nga Sllovenia deri në Shqipëri.
Udhëheqësi i këtij turi me kajakë, ish-sportisti olimpik, slloveni Rok Rozman, ka mbërritur të shtunën në Valbonë, ndërkohë që të dielën 150 kajakistë të udhëhequr nga Rozman kanë lundruar në Valbonë në mbrojtje të këtij parku, i cili kërcënohet nga ndërtimi i 14 hidrocentraleve, referojnë burime të EcoAlbania.
Më tej beteja e tyre, në datat 14-20 maj do të përqendrohet në lumin Vjosë, në Jug të Shqipërisë, e cila është edhe çështja kryesore e këtij turi, pasi lumi Vjosa është i fundit lumë që rrjedh egër në Evropë.
Rok Rozman dhe kajakistët që lundruan në Valbonë, përmes këtij akti i kanë kërkuar kryeministrit të Shqipërisë, Edi Rama, të anulojë kontratat koncesionare duke shpëtuar kështu zhvillimin e turizmit në Parkun Kombëtar të Valbonës… (b.an)
