Deputeti i maxhorancës, Pjerin Ndreu, ka shpërthyer dje gjatë mbledhjes së Komisionit të Sigurisë, duke thënë se administrata shtetërore është e mbushur plot me servilë, spiunë, dezinformatorë dhe me hajdutë.
Gjatë diskutimit të projektligjit për “mbrojtjen e sinjalizuesve”, deputet i Partisë Socialiste tha dje se servilët dhe spiunët janë të parët e vendit. Ai shtoi se edhe kur ndërrohet një drejtor apo një ministër, ndryshon stafin e vjetër dhe merr njerëzit e afërt, ndaj, sipas tij, ligji për sinjalizimin e korrupsionit nuk do të funksionojë.
“Në Shqipëri ka pak të penalizuar për korrupsion, sepse të korruptuarit kanë krijuar një perde tymi dhe i kanë lyer të gjitha me bojë dhe populli nuk merr vesh sepse janë pikërisht këta që e kanë në dorë, nëpërmjet atyre mekanizmave apo organizimeve klienteliste që bëjnë në administratë. Marrin dhe krijojnë rrethin e vet. Ne po shohim që në çdo vend të administratës që po u ndërrua një drejtor apo një ministër, duhet që i gjithë stafi të ikë dhe të vijnë njerëzit e vet dhe krijohet një strukturë, e cila, në këndvështrimin e ligjit të sinjalizuesit, nuk i shërben qëllimit të këtij ligji”, tha dje Ndreu.
DEBATI
Deputeti i PS-së, Pjerin Ndreu, u përfshi në debat me kryetarin e Komisionit, Spartak Braho, për deklaratat e forta të bëra gjatë mbledhjes.
Ndreu shtoi se: “Duhet të mbyllen hapësirat për njerëzit që dezinformojnë, mbajnë vendin e punës me spiunllëqe, mbajnë vendin e punës me dezinformacione, me intriga. Sepse intrigantët, dezinformuesit, spiunët, servilët, janë të parët e vendit në Shqipëri. Pastaj vijnë të tjerët. Kjo është e konfirmuar. Shteti shqiptar është shteti i servilëve, dezinformuesve, i hajdutëve, që kanë marrë frenat dhe kanë nxjerrë tym dhe nuk lënë kënd pa bërë me baltë dhe vetë dalin të larë dhe s’bëjnë asgjë. Nëse kjo nuk do të frenohet…”.
Por Spartak Braho i ka kërkuar deputeti të PS-së që të mos përgjithësojë dhe të mos flasë në mënyrë absolute. “Jo aq në mënyrë absolute zoti Ndreu. Shteti shqiptar të jetë kështu? Kot që rrimë dhe ne këtu!”, tha Braho, i cili i quajti deklaratat e tij si emocionale.
Në përfundim të mbledhjes, Braho i ka tërhequr vëmendjen deputetit të PS-së, “Po ça ke thënë mo burrë?”. Por Ndreu ka konfirmuar qëndrimin e tij duke thënë se kështu është realiteti. “Ashtu është… Ti e di më mirë se unë që ashtu është”, tha Ndreu, por Braho i ka dhënë të drejtë, por duke i thënë se: “E di po nuk thuhet ajo”.
DEBATI
Pjerin Ndreu: Duhet të mbyllen hapësirat për njerëzit që dezinformojnë, mbajnë vendin e punës me spiunllëqe, mbajnë vendin e punës me dezinformacione, me intriga. Sepse intrigantët, dezinformuesit, spiunët, servilët janë të parët e vendit në Shqipëri. Pastaj vijnë të tjerët. Kjo është e konfirmuar. Shteti shqiptar është shteti i servilëve, dezinformuesve, i hajdutëve që kanë marrë frenat dhe kanë nxjerrë tym dhe nuk lënë kënd pa bërë me baltë dhe vetë dalin të larë dhe s’bëjnë asgjë. Nëse kjo nuk do të frenohet…
Spartak Braho: Jo aq në mënyrë absolute zoti Ndreu. Shteti shqiptar të jetë kështu? Kot që rrimë dhe ne këtu!
Pjerin Ndreu: Unë nuk e thashë në mënyrë absolute, por thashë që në shumicën e rasteve këta njerëz janë të parët e vendit. Në qoftë se nuk i pëlqen ndonjërit, por kjo është realitet.
Spartak Braho: Dezinformuesit do të vazhdojnë punën edhe me ketë ligj.
Pjerin Ndreu: Po ta konfirmoj edhe një herë, në shtetin shqiptar të parët më të përkrahurit janë servilët, spiunët, dezinformuesit dhe njerëzit që janë pa karakter…
Spartak Braho: Një çik emocionale është…
Pjerin Ndreu: Ta konfirmova dhe një herë.
Spartak Braho: Dakord, mbyllet mbledhja. Po ça ke thënë mo burrë?
Pjerin Ndreu: Po desha ta them këtë gjë. Ashtu është… Ti e di më mirë se unë që ashtu është.
Spartak Braho: E di, po nuk thuhet ajo..
Erisa Proko, (Ministria e Pushtetit Vendor): Disa raste të suksesshme të sinjalizuesve, në janar të 2014, Bosnje Hercegovina miratoi ligjin për mbrojtjen e sinjalizuesve të korrupsionit dhe ligji ka mbrojtur me suksese zonjën Vishnja Mariloviç, ishllogaritare e një prej institucioneve publike në Hercegovinë dhe ajo zbuloi dhe dënoi korrupsionin e eprorit. Vishnja Mariloviç është një person, një sinjalizues i mbrojtur.
Spartak Braho: Këtu s’të mbron njeri, këtu të vrasin…
Paulin Sterkaj: Njerëzit që sinjalizojnë, janë njerëzit që kërkojnë të përfitojnë hap pas hapi në punën e tyre. Detyrën e tyre nuk e kanë kryer dhe janë marrë me shokun. A mendoni se ky ligj mund të kthehet në një problem real ndaj grupimeve të ndryshme në sektorëve të ndryshme. Unë e shikoj me shumë merak këtë pjesë. Njerëz që shqetësohen për thyerjen e ligjit ka plot në Shqipëri dhe këta nuk kanë munguar asnjëherë. Unë me bindjen time si deputet mendoj se nuk ka për të funksionuar si ligj në kohën e duhur në momentin e duhur. Apo është një ligj që duhet plotësuar për të pasur legjislacionin e BE.
Idlir Peçi (zv.ministër i Drejtësisë): Po është një nga ligjet që do të na ndihmojë ne për anëtarësimin në BE. Është një nga ligjet që është raportuar në BE dhe KE, dhe është futur në ato masat dhe planet e veprimit që ka hartuar qeveria për procesin e integrimit. Por nuk është vetëm përqasje formale, s’po bëjmë ligj sa për të kaluar radhën…
