Të gjitha fraksionet e PD janë rreshtuar pas Sali Berishës duke deklaruar votën e tyre kundër një amendamenti në Kodin Zgjedhor që detyron shtetin të paguajë postën e emigrantëve për votën e tyre nga jashtë. Ashtu si Berisha, edhe Enkelejd Alibeaj dhe Lulzim Basha kanë vendosur kushte.
Analisti Roland Lami, i ftuar në emisionin “Real Story”, tha se partitë e vogla bënë autogolin e parë, pasi vota e emigrantëve është më e domosdoshme për ta sesa partitë e mëdha. Sipas tij, partitë e vogla patën shansin që të tregonin me akte qëndrimin ndryshe nga Partia Demokratike e Sali Berishës.
“Janë dy komponentë. Së pari partitë që mendoj se do të garojnë në nivel koalicioni por të ndarë nga PD përpiqen të krijojnë një lloj identiteti te elektorati i djathtë për të thënë se jam ndryshe nga Berisha. Ky ishte momenti për të treguar nëpërmjet akteve politike që kanë qëndrim ndryshe nga PD, që ndoshta për arsyet e saj nxjerr pretendime të natyrës për të penguar procesin sesa shtyrë me tej atë. E dyta, nëse PD ndoshta se ka interesin që të jetë e përfshirë vota e diasporës, partitë e vogla duhet ta pretendojnë dhe ta shikojnë si shpresë të vetme ndryshimin që mund të sjellë vota e emigrantëve. Në këto dy momente shikoj autogolin e parë që bëjnë partitë përveç zotit Shehu, bën diferencën nëpërmjet qëndrimit parimor. Nxjerrin kushte që nuk kanë të bëjnë me votën e emigrantëve si votimi elektronik, që është i pamundur të bëhet apo listat e hapura që është mbyllur si marrëveshje. Mund të kishin rrethana të tjera me të cilat mund të kushtëzonin partitë e mëdha, por nuk është momenti tani. Fakti që nxjerrin këto artifica janë më shumë për t’u rreshtuar pro qëndrimit pengues të PD sesa për të nxjerrë kritere që e ndihmojnë procesin e votës së emigrantëve. Së dyti më habit vizioni elektoral për t’i hequr vetes një mundësi që është vota e emigrantëve, për të cilin PD ndoshta në llogaritë e saj e konsideron si të pavlefshme por partitë e vogla e kanë të domosdoshme që të shpresojnë te vota e emigrantëve.”, tha Lami.
