Zvicra e udhëheq botën, sa i përket aspektit të mbrojtjes së mjedisit të saj për Turizmin, referuar kështu Raportit të World Economic Forum, mbi Raportin e 2015 të Konkurrueshmërisë së Turizmit.
Raporti i Konkurrueshmërisë “Travel & Tourism 2015” është një indeks, studim i cili bazohet në një grup faktorësh dhe politikash, që mundësojnë zhvillimin e qëndrueshëm të sektorit të Turizmit dhe Udhëtimeve (T & T), i cili nga ana e tij, kontribuon në zhvillimin dhe konkurrencën e një vendi dhe që u botua disa muaj më parë në mediat ndërkombëtare.
Forumi Ekonomik Botëror sakaq, me ardhjen e stinës së vjeshtës ka përpiluar një raport, i cili bazohet vetëm në një nga faktorët e marrë në shqyrtim për 141 shtetet e “skanuara” për turizmin. Ajo e mbrojtjes së mjedisit për turizmin.
Po Shqipëria?
Ndërsa sezoni veror thuajse po përfundon, tashmë të paktë janë vizitorët që vijojnë të jenë të pranishëm në brigjet e Jonit dhe Adriatikut dhe të gjithë që kanë kaluar pushimet në brigjet tona kanë vënë re se si qendrojmë ne, krahasuar me rajonin apo më gjerë, për mbrojtjen e mjedisit. Forumi Ekonomik Botëror e ka renditur Shqipërinë sërish të fundit, në listën e vendeve të Evropës Juglindore dhe Perëndimore, për mbrojtjen e mjedisit për turizmin. Ajo ka marrë një pikësim prej 5.34 në këtë indeks, duke qendruar e fundit, teksa shtete si Serbia janë 5.46, Maqedonioa 5.75, Mali i Zi 5.69, Kroacia 6.00, Greqia 5.49 etj./Monitor/
