Në emisionin “Trialog” tema e diskutimit ishte raporti i fundit i Avokatit të Popullit mbi sistemin penitenciar të vuajtjes së dënimit.
Raporti ka ngritur alarme të forta për gjendjen e burgjeve në vend, duke shkuar deri në apel për mbylljen e pesë institucioneve.
E ftuar në studio ishte Ndihmës Komisionere pranë Avokatit të Popullit, Nertila Qafzezi, e cila theksoi se inspektimet kryhen në mënyrë periodike përmes mekanizmit për parandalimin e torturës.
Ajo u shpreh se raporti i fundit është i detajuar, me të dhëna, fakte dhe shifra që sipas saj janë shqetësuese për opinionin publik.
Ndihmës Komisionerja shtoi se, në veçanti, problematikat më të mëdha lidhen me paraburgimet, ku ka raste të mbipopullimit.
“Nëse një qeli është e parashikuar për katër persona, sot ndodhen gjashtë apo tetë. Ka pasur raste kur gjatë vizitave tona të pa lajmëruara kemi gjetur persona që flenë me shtretër në tokë,” tha përfaqësuesja e Avokatit të Popullit.
Ajo theksoi se vizitat kryhen pa paralajmërim, sipas metodologjisë së veçantë të përcaktuar nga Këshilli i Europës dhe OKB-ja, duke siguruar kontakt të drejtpërdrejtë me të dënuarit. Një tjetër problem i madh është mungesa e mjekëve në disa institucione.
“Në disa IEVP ka mungesë totale të mjekëve, ndërsa në disa të tjera shërbimi ofrohet vetëm për katër orë në ditë. Kemi mungesë shërbimi shëndetësor ambulantor, mungesë shërbimi të specializuar, dhe kjo ka sjellë një gjendje të rënduar në këto ambiente,” u shpreh ajo.
Ndihmës Komisionerja shtoi se gjatë inspektimeve stafi nuk është i pranishëm dhe komunikimi bëhet drejtpërdrejt me të dënuarit, duke i trajtuar ata me respekt dhe duke dëgjuar shqetësimet e tyre.
Megjithatë, ajo pranoi se ka pasur edhe raste përmirësimi të kushteve, si rezultat i rekomandimeve të bëra nga Avokati i Popullit.
“Vit pas viti gjetjet tona janë të përsëritura dhe të theksuara për kushtet dhe mënyrën e jetesës brenda burgjeve. Ne i cilësojmë gjetjet tona si të rëndësishme dhe rekomandimet i dërgojmë autoriteteve. Paraburgimi ka këto shifra shqetësuese dhe ka disa IEVP që kanë mbipopullim. Nëse një qeli është e parashikuar për katër persona, sot ndodhen gjashtë apo tetë. Ka pasur raste kur gjatë vizitave tona të pa lajmëruara kemi gjetur persona që flenë me shtretër në tokë.Metodologjia jonë është e përcaktuar mirë dhe në asnjë inspektim nuk njoftojmë se do kryejmë vizitë. Ne jemi pa praninë e stafit dhe jemi në kontakt të drejtpërdrejtë me të dënuarit, duke komunikuar me ta.Në disa IEVP ka mungesë totale të mjekëve, ndërsa në disa të tjera shërbimi ofrohet vetëm për katër orë në ditë. Kemi mungesë shërbimi shëndetësor ambulantor, mungesë shërbimi të specializuar, dhe kjo ka sjellë një gjendje të rënduar në këto ambiente.Gjithashtu ka raste kur kushtet janë përmirësuar, nga rekomandimet tona të dërguara autoriteteve.”- tha ajo
