Në reagimin e tij të parë në lidhje me prligjin për mbetjet urbane, Kryeministri Edi Rama ka pohuar se nëse situata do të ishte njëlloj si ajo e tre viteve më parë, atëherë ai nuk do ta pranonte këtë ligj.
Rama ka shtuar se që nga ajo kohë, kur PD kërkonte të fuste një ligj, në kohën kur as laboratorë nuk kishte, sot, situata ka ndryshuar.
Kryeministri ka dhënë detajet, duke shpjeguar se ligji nuk parashikon importin e mbetjeve të rrezikshme. Për më tepër, Rama ka shtuar se nëse nuk ndërhyhet, rrezikohet që sektori i riciklimit të mbetjeve të falimentojë dhe në rrugë të dalin më shumë se 3200 punonjës.
“Së pari nëse i referohemi 3 viteve më parë, unë do të bëja të njëjtën gjë, pasi gjithcka ishte jashtë kontrollit, sepse ligji nuk garantonte mbrojtjen nga plehrat e rrezikshme.
E kam thënë, mos sillni shembull Europën, por shikoni që s’kemi asnjë instrument kontrolli.
Në 2013 nuk kishte asnjë lloj kapaciteti në infrastruktrë apo burime njerëzore që mund të garantonte zbatimin e ligjit, ashtu sikur kishte probleme në garancitë e kontrollit.
Sot ka një laborator të certifikuar nga BE. Sot mbetjet do të hyjnë vetëm në tre pika që disponojnë kapacitet të plotë kontrolli, jo si me ligjin e 2013 ku mund të hynin kudo.
Sot laboratori bën të mundur të gjithë analizat e cdo materiali, por kemi edhe një ekip njerëzisht edhe ata të trajnuar nga BE, një program i tërë i BE është vënë në punë për rritjen e kapaciteteve fizike në këtë fushë.
Po të shikoni ligjin, përjashtohet cdo lloj mbetje për arsye incenerimi përvec pjesës së listës dhe cdo mbetje importohet vetëm… çdo mbetje importohet vetëm nga industria e riciklimit, që sot ka 3200 punonjës të siguruar dhe askush tjetër nuk ka të drejtë të bëjë asnjë lloj eksporti apo importi nga këtu. Nëse ne nuk do të bënim këtë ndërhyrje do të falimentonin industrinë e riciklimit dhe do të linin rrugëve 3200 punonjës dhe do të mbyllnim një front pastrimi mjedisor.
Me hartën dixhitale të mbetjeve urbane dhe me të, sot ne kemi një pamje të qartë të gjithckaje që ka në territorin e Shqipërisë për mbetjet e vendit.
Sic ju them që të kesh ndërtuar Lazaratin dhe të flasësh sot për fenomenin e marijuenës, sikur të ka rënë barra të shpëtosh vendin, është një maskaradë e madhe.
E njëjta ndodh me plehrat, shkoni shikoni pak Elbasanin… atje kishit lënë një mal me kërme, që i merrte frymën cdo natë fëmijëve e të moshuarve, ndërkohë që sot po ndërtohet një pyll i plotë.”- tha Rama.
