Ministri i Shëndetësisë Ilir Beqaj ishte sot në Maternitetin “Mbretëresha Geraldinë”, ku pa nga afër funksionimin e ECHO-s së parë 4D (4-dimensionale) në Qendrën e Shëndetit të Gruas të këtij institucioni.
Në fjalën e tij ministri Beqaj tha se ky spital është keqmenaxhuar gjithë këto vite. Sipas ministrit Beqaj nga ky keqmenaxhim janë mbi 500 mijë dollarë paisje mjekësore që janë jashtë përdorimit, pasi inventarizimi nuk egzistonte si koncept.
Të gjitha këto që thotë Beqaj, kanë ndodhur në vitet kur Halim Kosova ishte drejtor materniteti dhe ministër i Shëndetësisë.
“Për fat të keq, përtej fasadës, rezulton që ky spital në shumë vite është keqmenaxhuar. Ne kemi këtu pajisje mjekësore me vlerë rreth 500 mijë USD që janë jashtë përdorimit dhe ende janë në inventar kontabël, sepse deri në vjeshtën e vitit 2013 nuk ekzistonte koncepti i inventarizimit në këtë spital.”, tha Beqaj
Sa i përket deklaratave të Dr. Halim Kosovës për “paisjet dhuratë” të ardhura nga miku zvicerian i Kosovës, në fjalën e tij Beqaj tha se këto paisje nuk janë inventarizuar kurrë në Maternitet.
“Gjithashtu një sërë pajisjesh mjekësore të ardhura dhuratë, nuk janë inventarizuar kurrë, që gjë ka bërë që ata që e kanë drejtuar më parë këtë spital, ta trajtojnë si një pronë të tyre private, madje ta keqtrajtojnë si një pronë të tyre dhe t’i përdorin pajisjet që kanë ardhur dhuratë për spitalin, pra për gratë e Tiranës dhe të gjithë Shqipërisë që trajtohen këtu, sikur ta kishin një pronë të tyren. “, theksoi Beqaj.
Ministri u ndal edhe në kohën kur kandidati i PD, Dr. Halim Kosova ishte drejtor i Maternitetit “Mbretëresha Geraldinë” dhe ku sipas Beqajt, janë gjetur barna të skaduara.
“Në periudhën 2008-2009 ne kemi gjetur këtu barna të skaduara në vlerën 100 mijë dollarë. Këtu është një autoambulancë që prej 10 vitesh as nuk punon, as nuk kolaudohet, as nuk paguan taksa, por që deri në vjeshtën e 2013 shpenzonte karburant. “, shtoi Beqaj.
