Pas largimit të Ilir Prodës nga posti i Drejtorit të Përgjithshëm të Policisë së Shtetit, është hapur gara për përzgjedhjen e drejtuesit të ri të institucionit. Kjo e mërkurë, 11 mars, shënon edhe afatin e fundit për dorëzimin e aplikimeve.
Siç raporton gazetari i Klan News, Besar Bajraktaraj, kandidatët kanë dy mundësi për të paraqitur aplikimet e tyre. Dokumentacioni mund të dorëzohet fizikisht në protokollin e Ministrisë së Brendshme deri në orën 16:30, ndërsa përmes postës elektronike aplikimet mund të dërgohen deri në mesnatë.
Deri më tani raportohet se ka pasur interes për këtë post, ndërsa tetë kandidatë kanë dorëzuar tashmë dokumentacionin pranë Ministrisë së Brendshme. Bëhet fjalë për zyrtarë të Policisë së Shtetit me karrierë të gjatë në këtë fushë, të cilët synojnë të drejtojnë institucionin për një mandat 5-vjeçar, siç parashikon ligji.
Mes kandidatëve që kanë aplikuar është Pëllumb Seferi, aktualisht drejtor për Marrëdhëniet Ndërkombëtare në Policinë e Shtetit, i cili ka drejtuar operacione të shumta ekstradimi në vitet e fundit.
Po ashtu ka paraqitur kandidaturën edhe drejtori aktual i Policisë së Vlorës, Elidon Çela, i cili më herët ka drejtuar Agjencinë e Mbikëqyrjes Policore në Tiranë dhe ka mbajtur disa pozicione drejtuese në polici.
Një tjetër kandidat është drejtori i Policisë së Fierit, Skënder Hitaj, i cili gjatë karrierës së tij ka mbajtur poste drejtuese edhe në qarqet Shkodër dhe Dibër.
Në listën e aplikantëve është edhe Idajet Faskaj, i cili gjithashtu ka mbajtur poste të larta drejtuese në strukturat e Policisë së Shtetit.
Katër emra të tjerë të cilët paraqitën kandidaturat e tyre për këtë post gjatë kësaj të mërkure, janë ish-drejtori i Policisë së Tiranës Tonin Vocaj, drejtori i Policisë së Durrësit Afrim Tafa, Lorenc Panganika dhe Gentian Shehaj.
Proda qëndroi në këtë detyrë 17 muaj. Ai u largua pas protestës së 28 shkurtit, për shkak se nuk arriti të garantonte rendin dhe sigurinë, pasi protestuesit e opozitës arritën të hyjnë në ‘zemrën’ e qytetit, në zonën e ish-Bllokut dhe goditën me molotovë vilën e ish-diktatorit Enver Hoxha, brenda së cilës gjendeshin disa artistë të huaj. Deri në zgjedhjen e drejtorit të ri, në detyrë është komanduar zëvendësdrejtori Sokol Bizhga.
