Një shpërthim tritoli ka tronditur qytetin e Burrelit vetëm pak minuta pas mesnatës në katin e katër të një pallati, ku banon kryetari i Bashkisë Mat, Nezir Rizvani.
Lënda plasëse është vendosur 2 metra larg derës së kreut të bashkisë së Matit dhe 160 centimetra larg banesës së një 55- vejçari me iniciale M.B. Policia bën me dije se lënda plasëse ka shpërthyer, por fatmirësisht nuk ka pasur njerëz në banesë dhe nuk janë shkaktuar dëme në njerëz.
Sasia e tritolit e cila dyshohet të ketë qenë 50- 100 gramë, është vendosur në sheshpushimin e pallatit pesë katësh në lagjen “Drita” të Burrelit. Nga shpërthimi ka vetëm dëme materiale. Grupi hetimor po punon për zbardhjen e ngjarjes dhe identifikimin dhe arrestimin e autorëve.
Nezir Rizvani për Report TV
I kontaktuar nga Report Tv, kreu i Bashkisë së Matit, Nezir Rizvani, ka deklaruar se nuk kishte dieni për ngjarjen.
“Unë kam qenë në banesë dhe asnjë nga familjarët e mi nuk ishin.Nuk kisha asnjë dijeni për ngjarjen. Për shpërthimin jam lajmëruar nga komshinjtë. Nuk kam pasur asnjë lloj konflikt me asnjë”, është shprehur në një lidhje telefonike për Report TV kreu i Bashkisë Mat. Rizvani ka shtuar se edhe komshinjtë e tij janë njerëz punëtorë dhe nuk beson se ngjarja mund të ketë lidhje me ta.
Njoftimi i policisë
Rreth orës 00.40, Policia e Komisariatit Mat, ka marrë njoftim se në lagjen “Drita”, Burrel, në shesh pushimin e brendshëm të një pallati është vendosur dhe ka shpërthyer një sasi lëndë plasëse.
Menjëherë në vendngjarje kanë shkuar shërbimet e policisë dhe grupi hetimor, ku nga verifikimet paraprake rezultoi se :
Në lagjen “Drita”, Burrel, në shesh pushimin e brendshëm në katin e katërt të një pallati pesë katësh, midis dy hyrjeve, është vendosur dhe ka shpërthyer një sasi lënde plasëse.
Lënda plasëse ishte vendosur në shesh pushim me një distancë 160 cm larg derës së banesës të shtetasit M.B, rreth 55 vjeç, dhe 2 metra larg derës së banesës të shtetasit N.R, 53 vjeç, Kryetar i Bashkisë Mat.
Në të dy banesat e shtetasve M.B, dhe N.R, nuk ka patur asnjë njeri në banesë.
Si pasojë e shpërthimit janë dëmtuar pjesërisht dy dyert e banesave të shtetasve të lartëpërmendur.
Dyshohet se sasia e lëndës plasëse të ketë qenë rreth50 deri në 100 gramë.
Grupi hetimor vijon hetimet në vendin e ngjarjes, si dhe po punohet në mënyrë intensive për identifikimin dhe kapjen e autorit/ëve.
