Ministri i Shëndetësisë në Kosovë, Armend Zemaj ka pritur në takim ambasadorin e Republikës së Shqipërisë në Kosovë, Qemal Minxhozin, të cilit i ka konfirmuar se qytetarëve të Shqipërisë nuk do t’u kërkohet testi për COVID-19 kur të hyjnë në Kosovë.
Përmes një postimi në llogarinë e tij në Facebook, Zemaj shkruan se vendimi i Qeverisë se Kosovës është bazuar në parim të reciprocitetit dhe nuk do të kërkohen rezultatet e testimeve nga qytetarët Shqipërisë dhe as nga bashkëqytetarët nga Lugina e Preshevës.
“Sapo u takova me ambasadorin e Republikës së Shqipërisë në Kosovë z.Qemal Minxhozi, të cilit i konfirmova se qytetarëve të Republikës së Shqipërisë që hyjnë në territorin e Republikës së Kosovës, nuk u kërkohet testi për COVID-19. Vendimi i Qeverisë së Kosovës është i bazuar në parimin e reciprocitetit. Si rrjedhojë, nuk kërkohen testime nga qytetarët e Kosovës dhe Shqipërisë dhe as nga bashkëqytetarët tanë nga Lugina e Preshevës. Bashkë me ambasadorin Minxhozi, u zotuam që do të vazhdojmë bashkëpunimin e ngushtë mes dy shteteve!,”-shkruan ministri.
Kosova është një nga vendet më të prekura nga pandemia në rajon pasi shënon 7652 persona të infektuar, dhe 192 viktima. Kohët e fundit, me ardhjen e stinës së verës, qytetarët e Kosovës janë dyndur në Shqipëri si kurrë më parë për të kaluar pushimet në bregdetin shqiptar.
g.kosovari
