“Mos kini frikë se nuk do të përmend atë çikë burg që kam bërë, sepse atë punë e konsumoi zoti Nano, që u ankua para meje..”, do ta niste kështu fjalën e tij në parlament në mars 2002, Pjetër Arbnori. Kishte marrë fjalën për temën e nxehtë që po trajtonte seanca e asaj dite më 18 mars 2002, kur po diskutohej mocioni për shkarkimin e prokurorit të Përgjithshëm Arben Rakipi.
Ishte një situatë e nxehtë politike kur përmes aleancës fluide Meta-Berisha po mblidheshin votat për ta shkarkuar prokurorin e Përgjithshëm, i cili qoftë nga Berisha qoftë nga Meta konsiderohej prokuror politik.
Një seancë maratonë përmes diskutimeve të shumta, shquhet ai i Pjetër Arbnorit, i cili herë pas here lëshonte batuta duke shkaktuar të qeshura në sallën e deputetëve edhe kur klima politike mbërrinte majat e acarimit.
Tema publikon më poshtë pjesë të fjalës së Nanos dhe Arbnorit në debatin e seancës së 18 marsit 2002, për shkarkimin e prokurorit të përgjithshëm Arben Rakipi.
Fatos Nano – Të nderuar kolegë deputetë! Po flas këtu me autoritetin e atij që vjen pas dhe pasi persekutohet e burgoset nga regjimi i vjetër me të njëjtën forcë morale dhe kredibilitet politik me të cilët shqiptarët na votojnë për të qenë pasues të Berishës, por jo imitues të tij për të pestin vit radhazi….Unë kam përballuar burgun e Berishës, në emër të të gjithë atyre socialistëve e progresistëve që u dhunuan nga Berisha, sepse të ardhmen e Shqipërisë e shihnin në Europë, sepse kërkonin institucione të forta e të pavarura, sepse zhvillimin nuk e gjenin te piramidat mashtruese, sepse nuk pranoheshin të bënin flirt, kontrabandë nafte dhe armësh me regjimin e Milosheviçit. Pra si ish i burgosur politik po ju bëj thirrje:
Të nderuar deputetë,
Të mbrojmë institucionet e shtetit të së drejtës, Kushtetutën e Republikës së Shqipërisë dhe të mos lejojmë që vendi ynë të kthehet në trafikantë politikë, ku rrëzimi dhe shkatërrimi i institucioneve të shtetit të së drejtës zëvendëson përmirësimin dhe konsolidimin e autoritetit të ligjit.
Pjetër Arbnori – Të nderuar deputetë, mos kini frikë se do të përmend atë çikë burg që kam bërë, sepse atë punë e konsumoi zoti Nano, që u ankua para meje, pa më lënë mua paksa radhë..
Lidhur me propozimin e dy deputetëve socialistë për të krijuar një komision “shtyje ta shtyjmë” për të mbrojtur Arben Rakipin, unë do të thosha që, kur vdes njeriu, sado që t’u dhimbset disave, ai duhet të futet në dhe, me vajtim ose me bandë muzikore, nuk duhet lënë i pakallur edhe 10 ditë të tjera.
Gjatë 10 vjetëve, legjislacioni që lidhet me të drejtat e njeriut, u pasurua realisht. Kuvendi miratoi ligje kushtetuese, që për një gjysmë shekulli ishin injoruar; shteti shqiptar aderoi në konventat kundër torturës, në konventat për mbrojtjen e fëmijëve e të grave nga dhuna policore. Tashmë policia dhe prokuroria e kishin rrugën të hapur për të luftuar krimin me profesionalizëm. Por kishin edhe detyrimin për mbrojtjen e qytetarit të lirë, qoftë edhe të arrestuar e të dënuar, nga dhuna e panevojshme e policisë. Abuzimi ndaj qytetarit të lirë, si dhe ndaj fajtorit, është e ndaluar. E meta jonë është se Kuvendi ka bërë ligje të mira, por zbatimi i tyre lë për të dëshiruar. Sot disa titullarë, me fjalët ligj e demokraci në gojë hipin në pozita me qëllim që t’i shërbejnë vetes dhe klanit të tyre, duke minuar demokracinë…./Gazeta Tema
