Partia Demokratike ka reaguar zyrtarisht pas konfirmimit në detyrë të Kryeprokurores Arta Marku, e cila kaloi me sukses procesin e Vettingut.
Disa orë pas vendimit të KPK, deputeti Enkeleid Alibeaj akuzoi se po veprohet me dy standarte. Sipas tij, po konfirmohen në detyrë vetëm njerëzit që i shërbejnë kryeministrit Edi Rama.
Teksa e quan “kamikaze të Ramës”, Alibeaj ka deklaruar se ajo dhe kushdo që ka shkelur ligjin do dalin para drejtësisë.
“Arta Marku duhej të ishte shkarkuar, por kjo nuk ndodhi, pasi procesi drejtohet nga Edi Rama. Kush është në shërbim të tij do ta kalojë vettingun e do qëndrojë në detyrë. Sot në detyrë është një njeri i paaftë. Vedimi i sotëm i KPK, provon zbatimin e standarteve të dyfishta, duke larguar këdo që Rama ka futur në listën e tij të zezë e duke mbajtur ata që i shërbejnë. PD e konsideron mbajtjen në detyrë të kamikazes së Ramës si lajm i keq. Kushdo që ka shkelur ligjin do vendoset para drejtësisë, përfshirë dhe kamikazen e Ramës”, ka deklaruar Alibeaj.
Ai ka deklaruar mes të tjerash se Marku ka shkelur ligjin së paku pesë herë gjatë muajve në detyrë, dhe për këtë duhet të mbajë përgjegjësi.
“Arta Marku duhej shkarkuar për disa shkelje të rënda. Duke vepruar si prokurore politike, e ka vendosur prokurorinë në varësi të Ministrisë së Brendshme. Ajo ka transferuar e komanduar prokurorë në kundërshtim me ligjin. Ka kërkuar mbajtjen në burg të qytetarëve ajshtë kritereve”, ka dekaruar Alibeaj./a.m.
