Kreu i Komisionit të Ligjeve dhe një prej deputetëve propozues për ndryshimet në Kodin e Procedurës Penale, konkretisht në nenin 242, Ulsi Manja, ka sqaruar sot nga foltorja e Kuvendit se ndryshimet e propozuara nuk kanë për qëllim krijimin e imunitetit të ri për ministrat apo zyrtarët e tjerë të lartë, por synojnë thjesht një rregullim procedural dhe forcimin e balancimit të pushteteve.
“Sipas qëndrimit tjetër, ngjashëm me standardin e interpretimit të pranuar nga Gjykata, në rastin e regjimit të imuniteteve i cili duhet të jetë i ngushtë, i kufizuar, bazuar në vullnetin e kushtetutë bërësit në reformën e 2012 për zvogëlimin e imunitetit kushtetuta në formën e saj aktuale ka parashikuar autorizimin paraprak të Kuvendit për masat procedurale penale të parashikuar shprehimisht në nenin 73 pika 2 të saj. Pra regjimi i imuniteteve është rregulluar në nenin 73 pika 2 të Kushtetutës.
Në këtë dispozitë, nuk parashikohet masa ndaluese e pezullimit të ushtrimit nga detyra.
Sipas nenit 242 të Kodit të procedurës penale ndonëse zbatimi i kësaj mase pamundëson ushtrimin e funksioneve të ministrit dhe për pasojë ndërhyn në veprimtarinë e Këshillit të Ministrave”, theksoi Manja.
Ai shtoi se neni 242 i Kodit të Procedurës Penale, në formën aktuale, mund të pengojë ushtrimin e funksioneve të ministrit dhe të ndërhyjë në veprimtarinë e Këshillit të Ministrave, çka është pranuar edhe nga Gjykata Kushtetuese.
Manja theksoi se propozimi i ri nuk shton imunitet të ri, por synon vetëm të balancojë pushtetet dhe të rregullojë mekanizmat procedurale. Ai shtoi se nisma e propozuar do të diskutohet në debat kushtetues dhe juridik, duke iu përgjigjur opozitarëve që pretendojnë se ndryshimet krijojnë një “imunitet iluziv”.
“Kur të vijë këtu nisma, ta bëjmë debatit kushtetues dhe juridik jemi gati t’ju përgjigjemi ju që pretendoni se propozimi ynë është imunitet iluziv.
Ju po parashikoni te neni 242një imunitet që se jep Kushtetuta. Jo mo jo, nuk shtrohet çështje imuniteti, është rregullim procedural dhe jo zgjerim imuniteti kushtetues e as imunitet i ri”, përfundoi Manja.
