“Ka një të vërtetë që ne e kemi pranuar. Lëvizja e mjekëve nuk ka prekur vetëm Shqipërinë, por dhe vendet e tjera të Europës”. Kështu deklaroi mbrëmjen e djeshme ministrja e Shëndetësisë Ogerta Manastirliu.
E ftuar në një studio televizive, përballë një paneli me mjekë, kryesisht të specializuar jashtë shtetit, Manastirliu tha se tashmë qeveria shqiptare po përgatit një paketë për rikthimin e bluzave të bardha nga diaspora. Po ashtu ajo theksoi se Shqipëria nuk ka luks që të humbasë mjekë, të cilët vendosin që të largohen.
“Lëvizja e lirë e mjekëve nuk është një fenomen që ka prekur vetëm Shqipërinë, por vendet europiane. Është një lëvizje e lirë e trurit për të gjetur mundësi më të madhe. Qeveria po përgatit një paketë atraktive për të rithithur trurin e mjekëve që janë larguar dhe në vite të mëparshme. Shqiptarë të kualifikuar kanë ikur gjithmonë. Po bëjmë gati një paketë për rikthimin e tyre dhe rritjen e tyre profesionale dhe angazhimin e tyre këtu. S’jemi në një alert, Shqipëria se vuan mungesën e mjekëve sot”, u shpreh Manastirliu.
“Ne nuk kemi luksin që të humbim asnjë mjek. Vetëm në 2 vitet e fundit janë mbi 2 mijë infermierë që janë punësuar. Nuk kemi ende një shifër të largimit të mjekëve. Nëse në 2016 ka pasur mbi 20 mjekë që kanë kërkuar certifikata të sjelljes së mirë. Presim dhe bonuset e mjekëve”, tha ajo.
“Ne kemi ndërtuar sistemin, instrumentin e punësimit. Ne kemi 1500 infermierë në listë në pritje për tu punësuar. Ne shohim sot në 10 vite. Ky fenomen ka prekur të gjithë rajonin. Duhet të planifikojnë sot dhe në 10 vite. Nuk jemi në emergjencë. Nuk do të ishin 6.4 mln vizita që bëhen tek mjeku i familjes”, pohoi ajo.
Ministrja tha se çështja e cilësisë, është sfida e radhës për sektorin e shëndetësisë. “Çështja e cilësisë, është sfida e radhës për sektorin e shëndetësisë. Cilësia në shërbimin në sektorin e shëndetit publik. Nëse jemi përballur në 2013 me kushte të këqija, pa barna, sot është ndryshe. Në spitale, jo vetëm infrastrukturë, por dhe teknologji të përparuar.
Duhet të rritemi përballë cilësisë. Jemi nisur në 2013 me minus, kemi marrë një shëndetësi duke e nisur nga zero, nga fillimi, ndaj do na kërkojë kohën e domosdoshme për të ecur para. Por dhe cilësia është në Shqipëri. Kemi mjekë të mrekullueshëm, që krahasohen me mjekë të tjerë të Europës”, tha ajo.
/a.r
