Policia e Shtetit ka reaguar pas publikimit të lajmit për djegien e një makine pranë kufirit greko-shqiptar të mbushur me kanabis. Ne reagimin e shpërndarë për mediat, policia e shtetit sqaron se mjeti në fjalë nuk ka asnjë hyrje-dalje në vendin tonë. Ky reagim i policisë u shpërnda pasi në disa media u raportua nga burime të policisë së Igumenicës se automjeti ishte mbushur me drogë në kufirin e gjelbër. Policia sqaron se ka mbajtur komtakte me palën greke, por nga verifikimi i sistemit TIMS, sipas uniformave blu mjeti në fjalë nuk rezulton të ketë hyrë në territorin tonë.
Deklarata e policisë:
Në lidhje me ngjarjen e djegies së një makine, policia greke sqaroi se automjeti i djegur është tip “Hunday”, me targa YMO5933, me ngjyrë jeshile.
Këtij automjeti, rreth orës 09.00 (me orën lokale) në vendin e quajtur Paramithi, nga policia iu bë shenjë për të ndaluar, por drejtuesi i mjetit është larguar me shpejtësi.
Mjeti u ndoq nga Policia Greke dhe pas rreth 2 km, drejtuesi i mjetit e ka braktisur dhe i ka vënë zjarrin.
Drejtuesi i mjetit, me shtetësi polake është arrestuar më pas nga Policia.
Nga fotot që disponon policia greke, në brendësi të automjetit nga pjesa e pasme, dalloheshin qartë sasi të konsiderueshme lënde bimore e ngjashme me atë të Cannabis Sattiva, e pa paketuar.
Sipas Policisë Greke, itenerari më i mundshmëm i lëvizjes së mjetit është Paramithi-Prevezë.
Nuk ka asnje indicie qe lënda narkotike është nisur nga Shqipëria.
Kjo edhe nga gjendja e pa paketuar e ngarkesës.
Nga verifikimet e kryera në sistemin TIMS, rezulton se ky mjet nuk ka asnjë hyrje – dalje në Republikën e Shqipërisë.
Gjithashtu nga komunikimet me autoritetet greke edhe ata nuk e kanë deklaruar këtë gjë.
/a.m.
