Emmanuel Macron do të jetë të hënën në Panairin e Automjeteve në Paris, ku pritet të paraqesë agjendën “Made in Europe”, e cila synon të nxisë prodhimin e makinave dhe komponentëve në territorin e Bashkimit Evropian.
Kjo do të jetë pjesëmarrja e fundit e presidentit francez në këtë aktivitet në cilësinë e kreut të shtetit, pasi ai ka qenë i pranishëm në çdo edicion të panairit, që zhvillohet një herë në dy vjet.
Qëndrimi i Macronit është që mbështetja financiare nga shtetet dhe subvencionet e BE-së të lidhen më ngushtë me prodhimin konkret brenda unionit, sidomos për automjetet elektrike dhe bateritë.
Të dhënat për vitin 2025 tregojnë se në Francë u regjistruan 331 mijë automjete të reja elektrike, ndërsa prodhimi i fabrikave franceze arriti në 216 mijë njësi.
Vetëm 26 për qind e makinave elektrike të reja të shitura në tregun francez ishin prodhuar brenda vendit, çka pasqyron varësinë e lartë nga automjetet e importuara.
Parisi synon që industria evropiane të mos përqendrohet vetëm te montimi i makinave, por të ndërtojë një zinxhir të plotë prodhimi, duke përfshirë bateritë dhe pjesët e këmbimit.
Franca nuk i përjashton investimet nga Kina, por këmbëngul që ato të shoqërohen me transferim teknologjie dhe me prodhim real në Evropë.
Kjo politikë mund të sjellë përplasje me Gjermaninë, e cila druhet se kufizimet ndaj Kinës mund të dëmtojnë prodhuesit e saj të automjeteve. /Telegrafi/
