Presidenti francez Emmanuel Macron ka paralajmëruar se kërcënimi i sulmeve hibride nga Rusia kundër Evropës dhe Francës është intensifikuar.
Në një konferencë për shtyp në Pallatin Elysee, Macron tha se i kishte bërë thirrje qeverisë franceze të përgatiste një plan për të mbrojtur infrastrukturën kritike dhe vendet e industrisë së mbrojtjes përballë këtij kërcënimi.
Ai tha se Franca ishte shënjestruar nga sulmet hibride ruse në javët e fundit, të cilat nuk do të mbeteshin “pa përgjigje”.
Një numër gjithnjë e në rritje i udhëheqësve evropianë kanë paralajmëruar se Rusia mund të jetë duke përgatitur sulme për të testuar angazhimin e tyre në mbështetjen e Ukrainës.
Presidenti francez po fliste me gazetarët pas takimit me udhëheqësit e partive për të diskutuar ndikimin në siguri të luftërave në Lindjen e Mesme dhe Ukrainë.
Macron përmendi sulmin me dron të muajit të kaluar në aeroportin e Leipzigut në Gjermani , për të cilin u fajësua Rusia, dhe komentet e kryeministrit polak Donald Tusk që sugjeronin se Rusia po planifikonte sulme me dronë dhe raketa kundër Polonisë dhe vendeve të tjera në krahun lindor të NATO-s.
“Në javët e fundit, kërcënimi hibrid rus kundër evropianëve dhe kundër Francës është intensifikuar. Qëllimi është të na frikësojnë dhe të thyejnë përpjekjet tona për të mbështetur Ukrainën. Rezultati do të jetë krejt i kundërt. Ne nuk jemi të frikësuar sepse e dimë se siguria jonë sot dhe nesër është në rrezik në Ukrainë”, tha ai.
Macron shtoi se qeveria ishte ngarkuar me mbrojtjen e infrastrukturës kritike dhe vendeve “më të ndjeshme” të industrisë dhe teknologjisë së mbrojtjes kundër sulmeve kibernetike dhe dronëve.
Ai njoftoi gjithashtu se Franca do të thërrasë një takim të G7-ës për të diskutuar energjinë dhe për të ngritur çështjen e rezervave të gazit me Komisionin Evropian.
“Në javët e ardhshme, do të kemi një takim të G7 kushtuar këtyre çështjeve të energjisë, si për të forcuar bashkëpunimin ashtu edhe për të shmangur tensionet e panevojshme midis vendeve të G7 dhe partnerëve tanë kryesorë”, tha Macron.
“Do të jetë gjithashtu një mundësi për të shqyrtuar opsionet për një lirim ose zhbllokim të mundshëm të rezervave strategjike”, shtoi më tej presidenti Macron.
