Presidenti francez Emmanuel Macron ka theksuar rëndësinë e krijimit të një tregu të përbashkët në tri sektorë kyç për Europën: financë, energji dhe telekomunikacion. Gjatë një fjalimi të tij nga Tirana, ai theksoi se këto sektorë janë thelbësore për të ndihmuar Europën të përmirësojë kapacitetet e saj investuese dhe të arrijë një zhvillim të qëndrueshëm ekonomik.
Macron theksoi se krijimi i një tregu të përbashkët në këto fusha do të mundësojë kursime më të mëdha dhe përdorim më efikas të burimeve, duke shtuar se kjo është një mundësi për të qenë më konkurrues se fuqitë e mëdha si Kina, e cila, sipas tij, ka kursime të mëdha, por nuk i investon ato në kapital dhe inovacion.
“Ne duhet të krijojmë një treg të përbashkët në këto sektorë, sepse na duhen më shumë kapacitetet që të investojmë. Kemi më tepër kursime se Kina, por këto kursime nuk investohen në kapital dhe inovacion”, tha Macron.
Ai theksoi gjithashtu se Europa ka nevojë të bëjë investime të mëdha në fushat e sigurisë dhe mbrojtjes, teknologjisë së gjelbër dhe inteligjencës artificiale (AI). Këto fusha kërkojnë më shumë investime dhe do të jenë thelbësore për forcimin e pozitat e Europës në botë. “Këto tre fusha do të kërkojnë më shumë investime, ndaj na duhet një riformësim i buxhetit të përbashkët”, tha ai.
Në fund, Macron i bëri thirrje liderëve të Europës që të zgjedhin partneritetet e duhura për të ardhmen, duke theksuar se ky është momenti i së vërtetës për kontinentin.
“Pyetja është: a do të bëhemi një fuqi e gjelbër e aftë të mbrojë veten? Përgjigja është po,” përfundoi ai, duke shprehur optimizëm dhe besim në potencialin e Europës për të kapërcyer sfidat e së ardhmes.
