Shqiptarët në Luginë të Preshevës kaherë kanë kërkuar reciprocitet, duke vlerësuar se të drejtat që serbët i kërkojnë dhe i kanë në Kosovë, të njëjtat t’i kenë edhe ata. Dhe paralajmërimet për formimin e Asociacionit të Komunave Serbe, që me ngulm po kërkohet nga serbët, ka bërë që edhe ata të ngrenë kërkesat e tyre.
Jonuz Musliu, përfaqësues politik i shqiptarëve, ka paralajmëruar se nëse themelohet ky Asociacion, Lugina do të shpallë autonominë, me të drejtë të bashkimit me shtetin tonë amë, Kosovën.
Ai është thirrur në referendumin e banorëve të Luginës së Preshevës të mbajtur në fillimmarsin e vitit 1992, duke thënë se vetëvendosjen e popujve e garanton edhe Karta e OKB-së.
Musliu ka rikujtuar se disa herë kanë kërkuar reciprocitet si dhe që edhe Lugina e Preshevës të jetë pjesë e dialogut mes Kosovës e Serbisë, por se një kërkesë e tillë është injoruar si nga Serbia, ashtu edhe nga faktori ndërkombëtar.
Ai ka thënë se janë të përkushtuar që të gjitha këto kërkesa t’i arrijnë me mjete paqësore, pa dhunë, ngase “zgjidhja e problemit në Luginë do të thotë edhe paqe dhe stabilitet për rajonin”.
“Edhe për shqiptarët e Luginës duhet të vlejë parimi i reciprocitetit: atë që marrin serbët në Kosovë, të marrin shqiptarët në Luginë”, ka thënë ai.
