Tensionet në rritje në Lindjen e Mesme dhe mungesa e marrëveshjes mes SHBA dhe Iranit që po përshkallëzojnë së fundmi konfliktet e luftës mes tyre, mund të ndikojnë fuqishëm edhe në bursën e karburanteve.
Madje nafta mund të arrijë në 3 euro për litër në Itali brenda pak muajsh, nëse përshkallëzohet kriza në Lindjen e Mesme dhe nuk zhbllokohet situata në Ngushticën e Hormuzit.
Alarmi është ngritur nga presidenti i FederPetroli Italia, Michele Marsiglia. Kjo mund të ndikojë edhe në vendet e tjera evropiane apo të rajonit, përfshi edhe Shqipërinë, ku deri tani ka një çmim që shkon në 219 lekë për litër.
Marsiglia sqaroi se nuk bëhet fjalë për një rritje të menjëhershme, por për një skenar të mundshëm në mungesë të uljes së tensioneve. Sipas Marsiglias, vazhdimi i krizës mund të shkaktojë një përmbysje të fortë të tregjeve energjetike.
Çmimi i naftës së papërpunuar Brent ka arritur në 92–94 dollarë për fuçi, ndërsa gazi tregtohet rreth 63 euro për megavat-orë.
Pikërisht rritja e gazit konsiderohet shqetësimi më i madh për familjet dhe bizneset italiane, pasi pasojat mund të ndihen në faturat e muajve tetor dhe nëntor.
Rritja e çmimeve po zbeh edhe efektin e uljes me 17 cent të akcizës së naftës, masë që skadon më 25 gusht. FederPetroli paralajmëron se edhe strategjia italiane për diversifikimin e furnizimeve mund të vihet në rrezik, nëse kriza në Lindjen e Mesme zgjerohet.
