Me fillimin e luftës ndaj informalitetit në muajin shtator numri i bizneseve debitore ndaj Tatimeve, pothuajse është dyfishuar krahasuar me muajin gusht.
Nëse këto subjekte nuk paguajnë detyrimin tatimor janë të detyruara të shkojnë drejt falimentit.
Rrethi me numrin më të lartë të subjekteve të falimentuara është Vlora me 31% të totalit.
Sipas listës së tatimpaguesve me detyrime të papaguara të publikuar në faqen zyrtare të Drejtorisë së Përgjithshme të Tatimeve, rezulton se nga 118 biznese debitore të regjistruara në muajin gusht, numri i tyre deri më 1 tetor ka shkuar në 235.
Pra nga 13 133 biznese gjithsej në vështirësi për të paguar taksat deri më 31 gusht të 2015-ës, numri i tyre ka shkuar në 13 486 në fillim të muajit tetor.
Këto janë biznese ndaj të cilave administrata ka kryer të gjitha hapat ligjorë për mbledhjen e detyrimeve, që nga njoftimi i vlerësimit tatimor e deri tek bllokimi i llogarive bankare.
