Ekzekutimet e personave me akuza politike po rriten ndjeshëm në Iran që nga fillimi i konfliktit me SHBA-të dhe Izraelin më 28 shkurt. Sipas OKB-së, të paktën 32 të burgosur politikë janë ekzekutuar deri tani, ndërsa vitin e kaluar u regjistruan 45 ekzekutime për arsye politike, sipas Amnesty International.
Një nga të ekzekutuarit, Mehrab Abdollahzadeh, 29 vjeç, nga qyteti i Oroomiyeh, u arrestua në vitin 2022 gjatë protestave kombëtare pas vdekjes së Mahsa Amini në paraburgim për mosrespektimin e mbulesës së kokës. Ai akuzohej për përfshirje në vrasjen e një anëtari të forcave Basij, por tha në një mesazh zanor për rrjetin e të drejtave të njeriut në Kurdistan se akuzat ishin të rreme dhe i ishin marrë me tortura.
Shumë ekzekutime të këtij viti lidhen me akuzat për spiunazh për SHBA-të ose Izraelin, ose lidhje me grupe opozitare në emigrim. Disa u arrestuan pas kryengritjes së janarit, e cila u shtyp me forcë vdekjeprurëse, duke lënë mijëra të vrarë.
Organizatat për të drejtat e njeriut raportojnë se ekzekutimet përdoren për të frikësuar popullatën dhe për të shtypur çdo shenjë kundërshtimi. Zyrtarë të OKB-së dhe Amnesty International theksojnë se proceset gjyqësore shpesh janë të shpejta, pa transparencë, dhe akuzat janë shpesh të fabrikuara.
Ndër të ekzekutuarit e tjerë janë Sasan Azadvar, kampion karateje 21 vjeçar, dhe Erfan Shakourzadeh, student masteri 29 vjeç në inxhinieri aerospatiale, të cilët u dënuan për akte të lidhura me “spiunazh” ose “shpërfillje të fesë”.
Shumë familjarë nuk kanë marrë trupat e të afërmve dhe proceset gjyqësore shpesh zhvillohen pa njoftim paraprak. Aktivistët paralajmërojnë se kjo rritje e përdorimit të dënimit me vdekje tregon për një tentativë të regjimit iranian për të treguar forcën e tij përballë krizave të brendshme dhe të jashtme.
