Heshtja pllakosi mëngjesin e së hënës ambientet e shkollës industriale.
Dy të rinj, nxënës të kësaj shkolle, ditën e djeshme humbën jetën tragjikisht në një aksident me motor, duke tronditur thellë familjet, shokët dhe mbarë komunitetin.
Në vendin ku ndodhi ngjarja e rëndë, shokët e klasës janë mbledhur për të vendosur lule të bardha, qirinj dhe për të lënë mesazhe të shkruara me lot në letër.
Disa prej tyre nuk i mbajnë dot emocionet, përqafohen, qajnë dhe shikojnë në heshtje vendin ku u aksidentuan dy të rinjtë.
“Na dhemb shpirti, nuk e besojmë që nuk do t’i shohim më,” thotë një prej shokëve të klasës, me sytë e skuqur nga të qarët.
“Ishim gjithmonë bashkë, në shkollë, pas mësimit”, thonë ata jashtë kamerës.
Ngjarja ka rikthyer në vëmendje edhe shqetësimet për mungesën e sigurisë rrugore dhe rrezikun që paraqet drejtimi i motorëve pa masa të plota mbrojtëse.
