Prokurori i Përgjithshëm, Adriatik Llalla, nuk do të largohet nga posti i kreut të akuzës në dhjetor, por pas dy vitesh.
Burime pranë Prokurorisë se Përgjithshme bëjnë me dije se për shkak të ndryshimeve kushtetuese në kuadër të reformës ne drejtësi mandati i kreu të organit te akuzës është 7 vjet dhe ky parashikim ligjor vlen edhe për Adriatik Llallën i cili ka 5 vjet në këtë detyrë, raporton Vizion +.
Për të mbështetur këtë argument sipas Prokurorisë se Përgjithshme vlen edhe precedent i Ina Ramës, pasardhëses se Adriatik Llallës.
Kur Ina Rama u emërua nga Parlamenti, Prokurori i përgjithshëm ishte pa mandat e vetëm më vonë u ndryshua kushtetuta për ti vendosur një mandat 5-vjeçar, të cilin Ina Rama e respektoi duke u larguar nga detyra sapo u mbushen 5 vjet.
Për analogji sipas Prokurorisë së Përgjithshme mandati i Adriatik Llallës nuk është 5 vjet, por 7 siç e parashikon Kushtetuta aktuale.
Por një tjetër gjykim ndajnë ata që hartuan dhe miratuan ndryshimet kushtetuese ne kuadër te reformës në drejtësi.
Sipas Vizion +, burime pranë mazhorancës bëjnë me dije se mandati i Adriatik Llallës përfundon pas dy muajsh dhe sipas ligjit për prokurorinë ai duhet te largohet.
Deri në emërimin e pasardhësit, detyrat e tij i kryen prokurori më i vjetër ne Prokurorinë e Përgjithshme.
Ky lexim i ndryshëm i Kushtetutës pritet të sjellë një përplasje të re mes Prokurorit të Përgjithshëm dhe mazhorancës.
Por gjatë muajve të fundit Adriatik Llalla nuk është përplasur vetëm me shumicën qeverisëse por siç nuk ka ndodhur me asnjë institucion tjetër Prokurori i Përgjithshëm është përplasur edhe me ambasadorin amerikan në Tiranë, Donald Lu, një prej mbështetësve më të forte të reformës në drejtësi.
Por reforma ne drejtësi nuk sjell vetëm debatin për mandatin e Adriatik Llallës nëse është 5 vjet apo është 7 vjet.
Që të qëndrojë në detyrë qoftë edhe deri në dhjetorin e këtij viti Llalla duhet të kaloje së pari vettingun i cili do të nisë pikërisht nga ai./a.m.
