Prokuroria e Tiranës ka reaguar në lidhje me vendimin e gjykatës për shpalljen të pafajshëm të ish-Drejtorit të Tatimeve i vënë nën akuzë për përfitimin e 6 milionë eurove përmes skemave të mashtrimit.
Sipas organit të akuzës është absurd vendimi i Gjykatës ku nga 8 personat e akuzuar si të përfshirë në një skemë mashtruese me rimbursimin e TVSH-së, nga e cila kanë përfituar rreth 6 milion euro dy administratorë të disa firmave fantazmë, me ndihmën e disa ish-punonjësve të Drejtorisë së Tatimeve Tiranë, 7 prej tyre janë shpallur fajtorë në procese gjyqësore të veçuara, ndërkohë që ish-drejtori i Drejtori i Tatimeve Ismail Muça, është shpallur i pafajshëm.
Në përfundim të gjykimit, Prokuroria kërkoi shpalljen fajtor të shtetasit Ismail Muça dhe dënimin e tij me 14 vite burgim për veprat penale të “Vjedhjes duke shpërdoruar detyrën”, të kryer në bashkëpunim;“Fallsifikimit të dokumentave”, të kryer në bashkëpunim dhe “Pastrimit të produkteve të veprës penale”.
Nga ana e Prokurorisë së Tiranës, ky shtetas konsiderohej si personi kyç në këtë skemë mashtruese, për faktin se urdhëronte kontrollin mbi këto subjekte fantazmë, fillonte procedurën e rimbursimit, e miratonte atë dhe në fund urdhëronte me akte të veçantë për kalimin e shumës së rimbursimit të TVSH nga thesari i shtetit në llogari të kompanive, të cilat deklaronin në mënyrë fiktive xhiro biznesi.
Në seancën e fundit, zhvilluar ditën e sotme, trupi gjykues i drejtuar nga gjyqtari Artan Gjermeni e shpalli të pafajshëm.
Gjatë hetimit të zhvilluar nga Njësia Task-Force e Prokurorisë Tiranë, në bashkëpunim me administratën tatimore, u arrit të siguroheshin prova se dy administratorët, në bashkëpunim me zyrtarë të lartë të Drejtorisë Rajonale të Tatimeve të Tiranës kanë përfituar në mënyrë të padrejtë vlerën e rimbursimit të TVSH-së (Tatimit mbi Vlerën e Shtuar) për disa kompani, të cilat ekzistonin vetëm fiktivisht dhe nuk kishin zhvilluar asnjëlloj aktiviteti. Në këtë hetim dhe gjykim kanë qenë të përfshirë në total 8 persona, nga të cilët dy administratorë kompanish dhe 6 ish-punonjës të Tatimeve Tiranë, përfshirë edhe ish-drejtorin Muça.
Redaksia Online
(JavaNews.al)
