Shqipëria ka nevojë për një ndryshim të thellë të sistemit politik dhe jo thjesht për një rotacion të forcave në pushtet.
Kështu u shpreh sot në emisionin Off the Record në A2 CNN, kreu i LZHK-së Dash Shehi, i cili shpresën për ndryshim e shikon tek Europa dhe integrimi i vendit në BE.
“Ka ardhur dita për ta ndryshuar këtë sistem politik. Jo thjesht një rotacion, të iki ky e të vihet një tjetër, se këto janë vazhdim i të njëjtës skemë. Vetëm kështu Shqipëria mund të fillojë një rrugëtim të ri. Do të bëjmë do të bëjmë luftë edhe për ta ndryshuar sistemin. Këto zgjedhjet që janë këtu janë një test. Dhe do shikojmë sa do reagojë kjo popullata jonë”, u shpreh ai.
Shehi tha se vetërregullimi i sistemit nuk mund të vijë pa një ndryshim të madh që buron nga politika dhe shoqëria.
“Kjo rregullohet me një përmbysje të madhe që buron nga politika. Unë nuk them se këtu do bëhet republika e prokurorëve se urojmë që jo. Po uroj që të gjithë këto që po ndodhin të shtyjnë forcat e reja politike, njerëzit e progresit a mendojnë që ka ardhur dita për ta ndryshuar këtë sistem politik. Jo thjesht një rotacion, të iki ky e të vihet një tjetër se këto janë vazhdim i të njëjtës skemë. Edhe vetëm kështu them, mund që Shqipëria mund të fillojë një rrugëtim të ri”, vijoi politikani.
Sipas tij, problemi nuk lidhet vetëm me praninë e grupeve kriminale, por edhe me faktin që një pjesë e shoqërisë e ka pranuar korrupsionin si mënyrë jetese.
“Nuk është më çështje që në Shqipëri ka 10 grupe kriminale, se ka 100. Puna është që edhe një pjesë e shoqërisë është korruptuar, pranon korrupsionin si gjë normale, pranon si mënyrë jetese dhe nuk reagon”, tha Shehi.
Sipas tij, kontrolli dhe standardet europiane mund të ndikojnë në forcimin e institucioneve shqiptare dhe vendosjen e rregullave më të forta.
“Kam një shpresë te Europa. Sa më shumë i afrohemi Europës, edhe me këtë derexhe që jemi, e quaj të mundur që do sistemohen ca gjëra. Pse? Po marr policinë. Po të vijnë ata inspektorët e këtyre atje, nuk mund të ndodhë kjo. Do vihen ca rregulla. Duke pasur një kontroll që është superior, se këto që kanë qeverisur Shqipërinë e kanë qeverisur si individ, jo nëpërmjet institucioneve. Do fillojnë të kenë një valencë institucionet. Më mirë se kaq. Prandaj kam një shpresë tek Europa”, u shpreh ish-deputeti.
Duke sjellë si shembull rastin e Bullgarisë pas anëtarësimit në BE, Shehi tha se institucionet europiane mund të vendosin standarde edhe për emërimet politike në vendet anëtare.
“Kur hynë bullgarët në Europë që ishin si puna jonë pak a shumë sot, ishte një deputete që kishte burrin në burg, një ndërtues nga ato të mëdhenjtë, siç kemi ne këtu sa të duash. Dhe për ta shpërblyer atje, çuan këtë zonjën për komisionere në Europë. Po çfarë i thanë ato zonjat atje? Juve ju takon me sjellë një komisioner, po nuk do sillni këtë zonjën këtu, se ne nuk ulemi me këtë zonjën këtu tha me një rresht. Dhe u detyruan bullgarët e çuan një dikë tjetër”.
