Kreu i grupit parlamentar të PS, Taulant Balla ka dhënë një deklaratë për mediat ku ka folur lidhur me projektligjet që do të propozohen në Kuvend mes tyre edhe për atë nga ana e grupit parlamentar të PD-së për dekomunistizimin.
Ai tha se ishte në dakordësi të plotë për projektligjin e lustracionit. Ndërsa foli edhe për projektligjet e dekriminalizimit dhe të partive politike, duke thënë se nuk mund të lejohej që në Shqipëri të kishte kryetarë partish të cilët kishin qenë ish bashkëpunëtorë të sigurimit të shtetit.
“Është një punë e rëndësishme që është bërë deri më tani. Natyrshëm që ne kemi marrë kohën për t’i konsultuar. Do t’i depozitojmë, shpresojmë që nesër të kemi një takim prfundimtar me grupin e punës që kemi ngritur. Një gjë është e sigurtë, që dotë depozitohen.
Sa i takon dekriminalizimit, do shihet nëse kërkohet ndërhyrja në kushtetutë dhe e dyta në ligjin e partive politike, sikurse e kemi thënë që në Shqipëri nuk mund të jesh kryetar i një partie politike, me damkën e ish bashkëpunëtorit të sigurimit të shtetit”-tha Balla.
Kurse për Avokatin e ri të Popullit, ai tha se duhet të jetë person i denjë dhe jo i emëruar politik.
“Avokati i Populli nuk mund të jetë qokë politike, sikur ka ndodhur më parë, por përfaqësues i qytetarëve. Duhet të jetë përfaqësues i lartë, që duhet të ketë eksperiencë në mbrojtje të të drejtave të njeriut”, tha Balla.
Ndërsa për reformën territoriale tha se PS është gati për negociata por jo për të bërë pazar.
“Ka vend për negociata, por PS nuk bën pazar. Sot në Shqipëri, organet e qeverisjes vendore dhe bashkitë janë një transformim epokal me atë që kishim deri në vitin 2015. Historia që kishte 384 kryetarë bashkish dhe komunash, 384 këshilla, administrata dhe shoferë. Në një vend me më pak se 3 milionë banorë ishte e papranueshme”, tha ai.
