Janë përcjellë pasditen e sotme për në banesën e fundit çifti Daut dhe Lule Gjokola.
Ngjarja e rëndë tronditi Librazhdin dhe vendin tonë, një ditë më parë.
Të afërm, familjarë dhe miq të familjes, i kanë dhënë lamtumirën Daut dhe Lule Gjokolës, ndërkohë në ceremoni, ndonëse në gjendje të rënduar psikologjike morën pjesë edhe dy fëmijët, vajza e çiftit, studente në Tiranë, e shoqëruar nga ambulanca dhe të afërmit e saj.
Djali i vetëm i familjes, i cili ndodhej në banesë dhe është dëshmitari i vetëm i tragjedisë familjare është sjellë paradite në Tiranë për trajtim në gjendje të rëndë psikologjike, por pasdite u kthye dhe mori pjesë në ceremoninë mortore të prindërve të tij.
Ngjarja e rëndë ndodhi mbrëmjen e djeshme.
53-vjeçari Daut Gjokola vrau me thikë bashkëshorten, Lulen, duke e qëlluar disa herë. Pas krimit ai u hodh nga kati i shtatë i pallatit, në qendër të qytetit të Librazhdit.
Daut Gjokola besohet se pati një debat të ashpër me bashkëshorten, kur edhe ndodhi ngjarja. Debati dyshohet të ketë pasur lidhje mbi pasurinë e tyre, pasi çifti kishte edhe një biznes në qytet.
Pasi e kishte goditur disa herë me thikë, ai mësohet se ka pritur në ballkon derisa sa ka ardhur ambulanca dhe policia, kur edhe në gjendje të rëndë psikologjike u hodh duke përfunduar në oborrin e jashtëm të një lokali, ku edhe vdiq në vend, ngjarje që tronditi të pranishmit.
Më herët çifti nuk kishte shfaqur probleme, derisa ndodhja ngjarja e rëndë. Ata ishin parë të shëtisnin normalisht si çdo mbrëmje, edhe pak momente para ngjarjes, ashtu si edhe shumica e qytetarëve në shetitoren e këtij qyteti. Motive të tjera, përveç momentit depresiv të çastit nga ana e bashkëshortit kur ndodhi ngjarja, mbeten të paqarta. /l.m
