Ish-kryeministri Sali Berisha, i shpallur “non grata” nga DASH, është shprehur ditët e fundit se vendimi i Kryetarit të Partisë Demokratike, Lulzim Basha për përjashtimin e tij nga grupi parlamentar i Partisë Demokratike është jashtë çdo lloj norme statutore dhe ligji.
I ftuar në Spotlight nga Alban Dudushi, në Vizion Plus, opinionisti Arben Meçe shprehet se në fakt si pas tij, akti i përjashtimit të Berishës nga grupi parlamentar nga ana e Bashës është një lëvizje e mirëmenduar.
Sipas Meçes, ajo çka ne shohim këto ditë ëhstë një lëvizje e cila mundëson marrjen e Partisë Demokratike nga Berisha, në mënyrë që ky i fundit, duke përdorur suportin e partisë të mbrohet nga veprimet e SPAK.
“Kemi dy ngjarje të rëndësishme. Ngjarja e parë e rëndësishme është shpallja Non-grata e Berishës. Dhe ngjarja e dytë më e rëndësishme është shtatori. Dhe në shtator, të gjitha mediat janë një aktivizim i fortë i organave të drejtësisë në Shqipëri. Të gjitha këto, e vendosën Sali Berrishën përpara një fakti. Kush do ta mbronte Sali Berishën përpara një vendimmarrje mëtë madhe se sa thjeshtë Non-grata? A kishte në këtë moment Sali Berisha besim se Partia Demokratike do të ishte një mbështetje e tillë? Pikërisht, për të testuar forcën politike të PD-së, militantëve në mbështetje të Sali Berishës fillon aksioni. Dhe kjo që ju shihni, nuk ëhstë goditje ndaj Sali Berishës, sepse kërkesa e amerikanëve nuk ka qenë që të shkëputet nga grupi parlamentar. Por, kjo këtu që nuk e ka goditur Berishën, por thjeshtë e ka spostuar dhe i ka dhënë motivin Berishës, që të rikthehet në politikë. Atëherë, gjithë lëvizja që ju shihni nuk është gjë tjetër, veçse një lëvizje jashtëzakonisht mirë e strukturuar që Saliu të dalë në lëvizje, të rikthehet në krye të PD-së, të marrë partinë dhe të përdorë suportin, për tu mbrojtur ndaj veprimit që do të zhvilllohet nesër. Sepse SPAK-u është në operacion për të marrë masat”
Por, krejtësisht kundër qëndron aktivistja Evi Kokalari me opinion e saj, e cila guxoi ta quajë liderin e selisë blu ‘shejtan-budalla’. Sipas Kokalarit, Basha ka rënë në grackën e Edi Ramës dhe po shfrytëzohet nga ai.
“Lul Basha është kërcënuar në një farë forme, ose i është premtuar diçka shumë e madhe një ditë para Parlamentit dhe e përjashtoi Berishën. Kjo nuk ka asnjë dyshim. Dhe ka pafytyrësinë të dalë ditën e nesërme dhe të thotë që është lënduar nga ato që tha Sali Berisha. Atij t’i vijë shumë turp. Nuk mund të them që është thjeshtë i paaftë, por Basha është bërë një ‘shejtan budalla’ që e kanë shfrytëzuar. Ka rënë në grackë, e kanë shfrytëzuar ana e Edi Ramës. Shumë mirë, ia ka bërë, nëse je kaq i paaftë. Kjo është arsyeja pse ne momentalisht, pavarësisht se kush mund të jetë Sali Berisha duhet ta përkrahim atë, ta marrim nga Basha dhe pastaj ti vëmë presion Berishës që ta riformojë Partinë Demokratike.”
Ish-anëtari i Këshillit Kombëtar të PD-së, Edvin Kulluri, u shpreh në 3 mundësi zgjedhje që Basha kishte, do të rezultonte i humbur në secilën prej tyre.
“Lulzim Basha kishte tre zgjedhje. Të bënte atë që bëri. Të kundërshtonte SHBA-të. E treta, të jepte dorëheqjen dhe të largohej. Unë besoj që opzioni i tretë ishte më i miri për të shmangur vendosjen në këtë pozitë që ëhstë lose-lose. Basha, secilin nga dy vendimet e para që do të merrte, edhe duke debatuar me SHBA-të, edhe duke u futur në këtë konflikt me Sali Berishën është i humbur. Në të dy rastet do ta humbte kreun e PD-së, sepse mesa duket me SHBA-të është i shantazhueshëm, kurse me Sali Berishën, hesapin do ta ketë tek anëtarësia e partisë.”
/a.r
