Policia e shtetit ka marrë një sërë masash për garantimin e sezonit turistik.

Nga Orikumi, ku edhe u hap sezoni për pushuesit, ministri i Brendshëm, Fatmir Xhafaj deklaroi se do ketë kontroll të fortë ndaj përdorimit të motorëve të ujit, të cilët kanë shënuar disa viktima vitin e kaluar.

Xhafaj tha se është hartuar një plan me 5 pika për garantimin e sigurisë për qytetarët shqiptarë dhe turistët e huaj që do të vizitojnë Shqipërinë këtë verë.

Ministri theksoi se do ketë shtim të numrit të policisë përgjatë vijë bregdetare.

“Kemi programuar shtesë të numrit të policisë, stacione të reja, përforcimin e shërbimeve policore, FNSH do jetë në vijën bregdetare me ngarkesë. Do të ketë edhe lehtësi të lëvizjes në pikat kufitare për shqiptarët, kosovarët, por edhe për turistët e huaj” – tha Xhafaj në Orikum

Ndër pikat kryesore të planit policor këtë sezon turistik, bie në sy parandalimi i zhurmave që shkaktohen nga lokalet e natës kryesisht në orët e vona si dhe lëvizja e mjeteve motorike në det jashtë kontrollit dhe me shpejtësi. Dy shqetësime këto, që prej vitesh janë denoncuar nga qytetarët.

Ja pesë pikat për garantimin e sigurisë gjatë sezonit turistik

1 – Forcimin e rendit dhe sigurisë dhe shtim i punonjësve të policisë
2 – Menaxhim të trafikut rrugor në zonat me ngarkesë dhe në pikat hyrëse
3 – Kontroll të fortë ndaj motorëve të ujit
4 – Masa të forta për zhurmat dhe përdorimin pa orar të muzikës së lartë
5 – Vëmendje e shtuar për menaxhimin e kufirit dhe lehtësimin e kalimit

JavaNews/a.ç