Prokuroria e Tiranës ka dhënë pretencën për autorët e vrasjes së Marvi Mihalit.
Në seancën e sotme prokuroria ka kërkuar 24 vite burg për Dejvi Bitrajn, 20 vite për Marsel Allën, 18 vite për Eugen Bitrajn dhe 25 vite për Kridens Allën.
Sipas prokurorisë, autori i ngjarjes është Dejvi Bitraj, ndërsa 3 të pandehurit e tjerë, kanë qenë bashkëpunëtor.
Ndërkohë, gjatë seancës së sotme, prokuroria dha edhe vlerësime të saj mbi veprimet e autorëve të dyshuar, duke i konsideruar të papranueshme.
Gjithashtu, edhe për personin që nisi sherrin, prokuroria e konsideroi një veprim të papërgjegjshëm, që solli pasojë të rëndë.
Marvi Mihali u vra më 31 korrik të vitit 2017 në zonën e stadiumit “Dinamo”. Miku i tij Armend Haxhiu i kishte shitur një telefon Devi Bitrajt por nuk i kishte dhënë karikuesin. Pas debateve mes Haxhiut dhe Bitrajve është vendosur që të takohen për t’u sqaruar tek Dinamo. Haxhiu ka kërkuar që aty të shkonte edhe miku i tij Marvi Mihali dhe pas shumë telefonatash ka arritur ta bindë këtë të fundit.
