Ish-deputeti demokrat Astrit Patozi tha mbrëmjen e së premtes së grupet e reja parlamentare janë drejt krijimit të një forcë politike. Deklaratat erdhën në studion e emisionit “Java në RTSH” ndërsa Patozi tha se ky nuk është vetëm një opinion, por edhe një informacion që ai ka.
Ai u shpreh se do të jetë pjesë e forcës së re politike, ndërsa komenti se ky është një zhvillim natyral i deputetëve opozitarë.
“Unë do ta mbështes idenë e krijimit të atyre partive duke qenë edhe pjesë e tyre. Personalisht e nxis krijimin e një lëvizje të re, që mund të jetë parti, front etj. Ky është një opinion dhe një informacion që unë kam. Shumë shpejt mund të ndodhë diçka e tillë. Mund të jetë çështje orësh apo ditësh. Kjo do të ndodhë pa diskutim” – tha Patozi.
Ai komentoi edhe rolin e deputetëve të rinj, duket shtuar së është e drejta e tyre të jenë opozitarë dhe demokratë.
“Ka një lloj abuzimi kur duan ta ngatërrojnë Partinë Demokratike me të qenit opozitar. Deputetët e rinj nuk thonë se jemi PD, por shprehen se janë demokratë. Kjo është e natyrshme pasi vijnë nga listat e Lulzim Bashës dhe kanë një kauzë të tyren. Për këtë arsye ngritën edhe grupet parlamentare” – shtoi ai.
Patozi tha se nëse do të ishte deputet, do të merrte të njëjtin vendim si Rudina Hajdari apo Myslim Murrizi, duke qëndruar në Kuvend.
Sa i përket qëndrimit të Bashës dhe Krymadhit, se nuk ka zgjedhje pa Edi Ramën, Patozi tha se kjo nuk është arsye për të braktisur procesin.
“Ky është një qëndrim i tyre dhe t’i dalin Zot ata. Unë kam një qëndrim të ndryshëm, mendoj se duhet t’i rrinë përballë Edi Ramës dhe ta mundin në zgjedhje. Opozita nuk është një repart ushtarak me në krye një komandant. Mund të ketë pesë opozita që secila e kundërshton në mënyrën e saj qeverinë” – tha ish deputeti demokrat.
Astrit Patozi shtoi se opozita e braktisi arenën politike pikërisht në momentin kur sondazhet janë në favor të saj. Ai u shpreh se në këto kushte, PD dhe LSI duhet të hyjnë në zgjedhje pa e menduar gjatë.
Ndërkohë që për ish-anëtarin e Këshillit Bashkiak të Tiranës, Fabian Topollaj, shoqëria është aq e pjekur saqë të mos e djegin vendin nën drejtimin e opozitës jashtëparlamentare.
“Të shkojë loja politike deri në përplasje civile, kjo është e papërgjegjshme. Unë besoj se këtë konflikt nuk mund ta shkaktojnë politikanët, por vetë shoqëria. Dhe ajo është mjaft e pjekur për të mos e bërë këtë. Megjithatë unë mendoj se opozita është e vonuar për djegien e mandateve. Sot ne jemi në një situatë ku djegia e mandateve nuk ka dhënë një rezultat. Sigurisht që zgjedhjet janë mënyra sesi votuesit mund të përfaqësohen. Unë nuk e kuptoj dot sesi mund të pengohen zgjedhjet. Shpresoj që të krijohen mekanizmat që edhe populli opozitar të përfaqësohet, pavarësisht mospjesëmarrjes së PD-LSI etj” – tha Topollaj në studion e emisionit ‘Java në RTSH’.
