Sekretari i Përgjithshëm i Kuvendit të Shqipërisë ka njoftuar zyrtarisht hapjen e garës për plotësimin e dy vendeve vakante në Këshillin e Lartë Gjyqësor (KLGJ). Këto pozicione janë të rezervuara për përfaqësues nga trupa e pedagogëve të Fakulteteve të Drejtësisë dhe Shkollës së Magjistraturës.
Për t’u kualifikuar në këtë garë, individët e interesuar duhet të përmbushin një sërë kushtesh të rrepta profesionale dhe etike, mes të cilave të kenë jo më pak se 15 vjet përvojë profesionale si jurist; të jenë pedagogë me kohë të plotë për të paktën 5 vjet (me titullin “profesor” ose “lektor”) në një Fakultet Drejtësie të akredituar, ose pedagogë në Shkollën e Magjistraturës; të mos kenë mbajtur funksione politike në administratën publike apo pozicione drejtuese në parti politike gjatë 10 viteve të fundit.
Kriter tjetër edhe pastërtia e figurës. Kandidatët duhet të mos jenë dënuar penalisht, të mos kenë masa disiplinore në fuqi dhe të mos kenë qenë bashkëpunëtorë të ish-Sigurimit të Shtetit apo shërbimeve inteligjente.
Nëse janë ish-magjistratë, kandidaturat duhet ta kenë kaluar me sukses procesin e rivlerësimit kalimtar (Vettingun). Gjithashtu, nuk duhet të kenë konflikt interesi me anëtarë të tjerë të KLGJ-së.
Dokumentacioni dhe afatet
Kandidatët ftohen të dorëzojnë një dosje të plotë prej 15 dokumentesh, ku përveç atyre të identifikimit dhe karrierës, theksohet domosdoshmëria e paraqitjes së një platforme personale me qëllimet dhe objektivat që propozojnë të ndjekin nëse zgjidhen.
Për sa i përket afateve, procesi parashikon që brenda 7 ditëve nga ky njoftim, institucionet e arsimit të lartë dhe Shkolla e Magjistraturës duhet të nisin procedurat për shpalljen e thirrjeve të interesit dhe verifikimin e kandidaturave.
Brenda 15 ditëve nga shprehja e interesit, kandidatët duhet të dorëzojnë deklaratën e pasurisë për kontroll pranë ILDKPKI-së, si dhe formularin e dekriminalizimit pranë Autoritetit Kombëtar për Sigurinë e Informacionit të Klasifikuar (AKSIK).
Kuvendi thekson se i gjithë dokumentacioni duhet të jetë në gjuhën shqipe (origjinal ose i noterizuar), ndërsa paralajmëron se çdo deklarim i rremë sjell skualifikim të menjëhershëm dhe ndjekje penale.
